રાજકોટ શહેરમાં કાયદો અને વ્યવસ્થા સામે ગંભીર સવાલો ઊભા કરતી એક અત્યંત ચોંકાવનારી અને હચમચાવી નાખનારી ઘટના સામે આવી છે. શહેરના આજીડેમ વિસ્તારમાં આવેલી 'તન્વી ગોલ્ડ' નામની જ્વેલરીની દુકાનના સંચાલક પર ફાયરિંગ કરીને લૂંટને અંજામ આપ્યો છે. આ ઘટનામાં લૂંટારુઓની ગોળીબારની હિંસક ઘટનામાં ગંભીર રીતે ઘાયલ થયેલા સંચાલક લાલજીભાઈ સરધારાનું હોસ્પિટલમાં સારવાર દરમિયાન કરુણ મોત નીપજ્યું છે, જેના કારણે વેપારી લોબીમાં ભારે રોષ અને શોકનું મોજુ ફરી વળ્યું છે.

પ્રાપ્ત વિગતો અનુસાર લૂંટારુઓ આશરે 1 કિલોગ્રામ સોનું અને 3 કિલોગ્રામ ચાંદીના કિંમતી દાગીના લૂંટીને ફરાર થઈ ગયા હતા. અંદાજ મુજબ લૂંટાયેલા સોના-ચાંદીના આ ઘરેણાંની બજાર કિંમત આશરે રૂપિયા 1 કરોડ જેટલી હોવાની શક્યતા વ્યક્ત કરવામાં આવી રહી છે. ઘટનાની જાણ થતાં જ ઇજાગ્રસ્ત લાલજીભાઈને તાત્કાલિક ધોરણે શહેરની મધુરમ હોસ્પિટલ ખાતે ખસેડવામાં આવ્યા હતા, જ્યાં ટૂંકી સારવાર બાદ તેમનું દુઃખદ અવસાન થયું હતું.

​​​​​​​

મૃતક લાલજીભાઈ

આ સનસનાટીભર્યા લૂંટ અને હત્યાના સમાચાર મળતા જ પોલીસ વિભાગમાં હડકંપ મચી ગયો હતો. પોલીસ કમિશનર (CP), સંયુક્ત પોલીસ કમિશનર (JCP) અને નાયબ પોલીસ કમિશનર (DCP) સહિતના ઉચ્ચ પોલીસ અધિકારીઓનો કાફલો તાત્કાલિક ઘટનાસ્થળે દોડી ગયો હતો. પોલીસ દ્વારા આસપાસના સમગ્ર વિસ્તારના સીસીટીવી (CCTV) ફૂટેજ મેળવીને તેની ઊંડાણપૂર્વક તપાસ કરવાની કામગીરી હાથ ધરવામાં આવી છે.

શહેરમાં કોઈ આરોપી નાસી છૂટે નહીં તે માટે પોલીસ કમિશનર દ્વારા રાજકોટ શહેરની બહારના તમામ રસ્તાઓ અને હાઇવે પર સઘન વાહન ચેકિંગ કરવાના કડક આદેશો જારી કરવામાં આવ્યા છે. આ ઉપરાંત, આસપાસની જિલ્લા પોલીસને પણ આ લૂંટ અને હુમલા વિશે સત્તાવાર જાણકારી આપીને એલર્ટ કરી દેવામાં આવી છે. ફરાર થઈ ગયેલા ચારેય લૂંટારુઓને ઝડપી પાડવા માટે પોલીસની અલગ-અલગ ટીમો કામે લગાડવામાં આવી છે અને સઘન નાકાબંધી કરાઈ છે.