રાજકોટ ગ્રામ્ય પોલીસ અને PGVCL દ્વારા સંયુક્ત રીતે વિંછીયા તાલુકાના મોટામાત્રા ગામમાં વહેલી સવારથી જ 'મેગા કોમ્બિંગ' હાથ ધરીને ગેરકાયદેસર પ્રવૃત્તિઓ પર જોરદાર પ્રહાર કરવામાં આવ્યો છે. રાજકોટ રેન્જ આઈ.જી. અશોક કુમાર અને જિલ્લા પોલીસ અધિક્ષક વિજય સિંહ ગુર્જરના સીધા માર્ગદર્શન હેઠળ આ ઓપરેશન પાર પાડવામાં આવ્યું હતું.

પોલીસ અને PGVCLની સંયુક્ત કાર્યવાહી

આ મેગા સર્ચ ઓપરેશનનું નેતૃત્વ ડૉ. નવીન ચક્રવર્તીએ સંભાળ્યું હતું. જેમાં LCB (લોકલ ક્રાઈમ બ્રાન્ચ), SOG (સ્પેશિયલ ઓપરેશન ગ્રુપ), QRT (ક્વિક રિસ્પોન્સ ટીમ) અને વિવિધ પોલીસ સ્ટેશનોના જવાનોનો કાફલો જોડાયો હતો. સુરક્ષા વ્યવસ્થાની સાથે PGVCLની પણ 20 જેટલી ટીમો તપાસમાં જોડાઈ હતી, જેના કારણે આખા ગામમાં ફફડાટ વ્યાપી ગયો હતો.

વીજ ચોરી પર મોટી તરાપ: 74 જોડાણો કપાયા

તપાસ દરમિયાન PGVCLની ટીમોએ ગામમાં મોટાપાયે ચાલતી વીજ ચોરી ઝડપી પાડી હતી.

વીજ જોડાણો: કુલ 74 ગેરકાયદેસર વીજ જોડાણો સ્થળ પર જ કાપી નાખવામાં આવ્યા હતા.

દંડની રકમ: વીજ કંપની દ્વારા અંદાજે ₹68.6 લાખ જેટલી માતબર રકમનો દંડ ફટકારવામાં આવ્યો છે.

વાયર જપ્તી: ખેતીવાડીમાં ગેરકાયદેસર રીતે વપરાતા થ્રી-ફેઈઝ જોડાણોમાંથી અંદાજે 12,500 મીટર કેબલ વાયર જપ્ત કરવામાં આવ્યો છે.

ગુનેગારોના નિવાસસ્થાને દરોડા

માત્ર વીજ ચોરી જ નહીં, પરંતુ કાયદો અને વ્યવસ્થા જાળવવા માટે પોલીસે ગામના 8 રીઢા ગુનેગારોના નિવાસસ્થાને પણ દરોડા પાડ્યા હતા. આ સર્ચ ઓપરેશન દરમિયાન શંકાસ્પદ જણાતા 2 બિનવારસી અથવા ગેરકાયદેસર વાહનો પણ ડિટેઈન કરવામાં આવ્યા છે. આ આખી કામગીરીનો મુખ્ય ઉદ્દેશ્ય ગ્રામ્ય વિસ્તારોમાં થતી ગેરકાયદેસર પ્રવૃત્તિઓને ડામવાનો અને ગુનેગારોમાં પોલીસનો ખોફ પેદા કરવાનો છે. પોલીસ અને વીજ કંપનીના આ સંયુક્ત ઓપરેશનથી અન્ય તત્વોમાં પણ ફફડાટ જોવા મળી રહ્યો છે. આવનારા દિવસોમાં પણ આવા 'કોમ્બિંગ' ચાલુ રહે તેવી શક્યતા સેવાઈ રહી છે.