વૈજ્ઞાનિકોએ વિશદ સંશોધન હાથ ધરીને શોધી કાઢ્યું છે કે 2015 ની આસપાસથી જ ગ્લોબલ વોર્મિંગની ગતિ ઝડપી બની છે. પોટ્સડેમ ઇન્સ્ટિટ્યૂટ ફોર ક્લાઇમેટ ઇમ્પેક્ટ રિસર્ચના વિશ્લેષણના આધારે વૈજ્ઞાનિકોએ આ દાવો કર્યો છે. સંશોધકો કહે છે કે વૈશ્વિક તાપમાન દર દાયકામાં આશરે 0.35°સે ના અંદાજિત દરે વધી રહ્યું છે. 1970 અને 2015 ની વચ્ચે, તાપમાનમાં વધારોનો સરેરાશ દર દાયકામાં 0.2°સે કરતા થોડો ઓછો હતો. આ અભ્યાસ વૈજ્ઞાનિક જર્નલ જીઓફિઝિકલ રિસર્ચ લેટર્સમાં પ્રકાશિત થયો હતો. સાયન્સ ડેઇલીના અહેવાલ મુજબ, અમેરિકન આંકડાશાસ્ત્રી અને અભ્યાસના સહ-લેખક ગ્રાન્ટ ફોસ્ટરે જણાવ્યું હતું કે, "અમે 2015 ની આસપાસથી ગ્લોબલ વોર્મિંગને વેગ આપતા જોયા છે. આ ગરમી અને વિશ્વિક હવામાન પરિવર્તન કઈ રાતોરાત નથી આવી ગયું. તેની અસરો 10 વર્ષ પહેલાથી જ દેખાવાની શરુ થઈ ગઈ હતી.

પાંચેય તાપમાન રેકોર્ડ્સ સમાન પેટર્ન દર્શાવે છે, ભલે ડેટા વિવિધ વૈજ્ઞાનિક સંગઠનો દ્વારા સંકલિત કરવામાં આવ્યો હતો અને અલગ અલગ પદ્ધતિઓનો ઉપયોગ કરવામાં આવ્યો હતો. 2013 અથવા 2014 માં તમામ ડેટાસેટ્સમાં ગ્લોબલ વોર્મિંગ દેખાવાનું શરૂ થયું. સંશોધકો માને છે કે આ મોટો ફેરફાર 2015 ની આસપાસ શરૂ થયો હતો, જ્યારે તેના પુરાવા સ્પષ્ટ થયા હતા.