ભૂતપૂર્વ ભારતીય સેના પ્રમુખ જનરલ મનોજ મુકુંદ નરવણેની આત્મકથા 'ફોર સ્ટાર્સ ઓફ ડેસ્ટિની'ને લગતા ચાલી રહેલા વિવાદ વચ્ચે પ્રકાશન કંપની પેંગ્વિન રેન્ડમ હાઉસ ઇન્ડિયાએ ગઈકાલે એક સ્પષ્ટતા જારી કરી હતી. પ્રકાશને સ્પષ્ટ કર્યું કે આ પુસ્તક હજુ સુધી પ્રકાશિત થયું નથી અને તેને પ્રિન્ટ, ડિજિટલ અથવા અન્ય કોઈપણ સ્વરૂપમાં જાહેરમાં વિતરિત કરવામાં આવ્યું નથી.

પેંગ્વિન રેન્ડમ હાઉસ ઇન્ડિયાએ જણાવ્યું હતું કે તે પુસ્તક પ્રકાશિત કરવાનો એકમાત્ર અધિકાર ધરાવે છે. તેના નિવેદનમાં, પેંગ્વિન પબ્લિકેશન્સે જણાવ્યું હતું કે, અમે સ્પષ્ટ કરવા માંગીએ છીએ કે પુસ્તક હજુ સુધી પ્રકાશન પ્રક્રિયામાં પ્રવેશ્યું નથી. પુસ્તકની કોઈ નકલ ભલે તે પ્રિન્ટ, ડિજિટલ અથવા અન્ય કોઈપણ ફોર્મેટમાં હોય પણ પેંગ્વિન રેન્ડમ હાઉસ ઇન્ડિયા દ્વારા પ્રકાશિત, વિતરણ, વેચાણ અથવા જાહેરમાં ઉપલબ્ધ કરાવવામાં આવી નથી.

પેંગ્વિન પબ્લિકેશન્સે એમ પણ જણાવ્યું હતું કે પુસ્તકની કોઈપણ નકલ ભલે તે પ્રિન્ટ, પીડીએફ, ડિજિટલ અથવા અન્ય કોઈપણ ફોર્મેટમાં હોય, કોઈપણ પ્લેટફોર્મ પર ઓનલાઈન કે ઓફલાઈન ઉપલબ્ધ હોય, તેના કોપીરાઈટનું ઉલ્લંઘન છે અને તેને તાત્કાલિક બંધ કરી દેવી જોઈએ. કંપનીએ એમ પણ કહ્યું હતું કે તે ગેરકાયદેસર અને અનધિકૃત પ્રસાર સામે તમામ કાનૂની વિકલ્પો અપનાવશે.

દિલ્હી પોલીસે એફઆઇઆર નોંધાવ્યા બાદ પેંગ્વિન રેન્ડમ હાઉસ ઇન્ડિયા તરફથી આ સ્પષ્ટતા કરવામાં આવી છે. પોલીસના જણાવ્યા અનુસાર, જરૂરી સત્તાવાર મંજૂરી ન હોવા છતાં, પુસ્તકનું પ્રી-પ્રકાશન વર્ઝન સોશિયલ મીડિયા અને કેટલાક ઓનલાઈન પ્લેટફોર્મ પર કથિત રીતે પ્રસારિત થઈ રહ્યું હતું. તપાસ દરમિયાન, પોલીસને કેટલીક વેબસાઇટ્સ પર પુસ્તકની ટાઇપસેટ પીડીએફ કોપી મળી, જ્યારે તેનું અંતિમ કવર કેટલાક ઓનલાઈન પ્લેટફોર્મ પર વેચાણ માટે ઉપલબ્ધ હોય તેવું દર્શાવવામાં આવ્યું હતું.

જનરલ મનોજ મુકુંદ નરવણેએ 31 ડિસેમ્બર, 2019થી 30 એપ્રિલ, 2022 સુધી ભારતીય સેનાના 28મા ચીફ તરીકે સેવા આપી હતી. આ આત્મકથામાં સેકન્ડ લેફ્ટનન્ટના પદથી લઈને આર્મી સ્ટાફના વડાના પદ સુધીની તેમની લગભગ ચાર દાયકા લાંબી લશ્કરી કારકિર્દીનું વર્ણન કરવાની અપેક્ષા છે. અહેવાલો અનુસાર, તે ગલવાન ખીણમાં થયેલી અથડામણ જેવી મહત્વપૂર્ણ ઘટનાઓને પણ પ્રકાશિત કરશે, જે 1962 પછી ભારત અને ચીન વચ્ચેનો સૌથી ગંભીર લશ્કરી મુકાબલો છે.

પુસ્તકને લઈ લોકસભામાં હોબાળો થયો

લોકસભામાં બે અને ત્રણ ફેબ્રુઆરીના રોજ રાહુલ ગાંધીએ એક મેગેઝિનમાં છપાયેલા આર્ટિકલને વાંચવાનો પ્રયાસ કર્યો હતો. તેમણે દાવો કર્યો હતો કે તેમાં નરવણેના પુસ્તકના અંશો છે. સ્પીકર ઓમ બિરલાએ તેની મંજૂરી આપી ન હતી. ત્યારબાદ લોકસભામાં હોબાળો થયો હતો, જેના કારણે કાર્યવાહી સ્થગિત કરી દેવામાં આવી હતી. તે જ સમયે, હોબાળો કરનાર આઠ સાંસદોને સસ્પેન્ડ કરવામાં આવ્યા હતા. ત્યારથી આ પુસ્તક ચર્ચામાં છે.