સમગ્ર રાજ્યમાં આજે તા.૭ ઓક્ટોબર, બુધવારથી મહેસૂલી કર્મચારીઓની અનિશ્ચિત મુદતની હડતાળ શરૂ થવા જઈ રહી છે, જેના કારણે દૈનિક વહીવટી કામગીરી ગંભીર રીતે ખોવાઈ જશે અને હજારો અરજીઓ અટકી જશે. બુધવારે કલેક્ટર કચેરીઓ બહાર વ્યાપક ધરણાં યોજવાની પણ જાહેરાત કરવામાં આવી છે.મંડળના મહામંત્રીએ આક્ષેપ કર્યો છે કે ૯,૦૦૦થી વધુ મહેસૂલી કર્મચારીઓની ન્યાયસંગત માંગણીઓને દબાવી દેવાના હેતુથી અમદાવાદ કલેક્ટર દ્વારા વહીવટી સરળતાના નામે મંડળના હોદ્દેદારો સહિતના ડેપ્યુટી મામલતદારોની દ્વેષપૂર્વક બદલીઓ કરવામાં આવી છે, જેને લઈને કર્મચારીઓમાં ભારે રોષ અને અસંતોષ પ્રવર્તી રહ્યો છે. આ બદલીઓને કર્મચારીઓએ હડતાળના મુખ્ય મુદ્દા તરીકે સ્વીકારીને સંગઠિત વિરોધ નોંધાવ્યો છે. અગાઉ ૮ મહિના પહેલાં જિલ્લા બદલી થઈને આવેલા ડેપ્યુટી મામલતદારોની હાલ ફરી બદલી કરીને હડતાળ તોડવાનો પ્રયાસ કરવામાં આવી રહ્યો છે તેવા ગંભીર આક્ષેપો પણ કરાયા છેકર્મચારી મંડળે ચીમકી ઉચ્ચારી છે કે જો આ બદલીઓના આદેશો તત્કાલ પરત ખેંચવામાં નહીં આવે, તો આગામી સમયમાં રાજ્યભરના મહેસૂલી કર્મચારીઓ વધુ આક્રમક બનેલા સ્વરૂપે અનિશ્ચિત મુદતની હડતાળ પર ઉતરી જશે. આ વ્યાપક હડતાળ અને ધરણાં પ્રદર્શનને કારણે સામાન્ય નાગરિકોના જમીન, દસ્તાવેજ અને અન્ય આવશ્યક મહેસૂલી કામો અટવાઈ જશે, જેનાથી વહીવટી તંત્ર પર મોટું દબાણ ઊભું થવાની સંભાવના છે.