સૌરાષ્ટ્રની સૌથી મોટી ગણાતી રાજકોટની પી.ડી.યુ. (સિવિલ) હોસ્પિટલ ફરી એકવાર પોતાના કથળેલા વહીવટ અને ગરીબ દર્દીઓ પ્રત્યેની ઘોર સંવેદનહીનતાને કારણે વિવાદના વમળમાં ફસાઈ છે. આ સરકારી હોસ્પિટલમાં દરરોજ રાજકોટ શહેર ઉપરાંત આજુબાજુના અનેક ગ્રામ્ય વિસ્તારોમાંથી હજારો ગરીબ અને મધ્યમ વર્ગના દર્દીઓ મફત તેમજ યોગ્ય સારવાર મેળવવાની આશાએ આવે છે, પરંતુ અહીં તંત્રની ઉદાસીનતાને કારણે તેમને ભારે હાલાકી ભોગવવી પડી રહી છે.

દાતાઓના પવિત્ર દાનની સરેઆમ અવગણના

સિવિલ હોસ્પિટલનું કેમ્પસ ખૂબ જ વિશાળ છે, જેના કારણે ગંભીર રીતે બીમાર દર્દીઓ, સગર્ભા મહિલાઓ અને વૃદ્ધોને એક વિભાગમાંથી બીજા વિભાગમાં અથવા લેબોરેટરી સુધી તપાસ માટે જવામાં ભારે તકલીફ પડતી હોય છે. આવા લાચાર દર્દીઓની સુવિધામાં વધારો થાય અને તેમને કેમ્પસમાં સરળતાથી હેરફેર કરી શકાય તેવા શુદ્ધ આશયથી શહેરની વિવિધ સેવાભાવી સંસ્થાઓ અને અગ્રણી દાતાઓ દ્વારા લાખો રૂપિયાની કિંમતની ખાસ રિક્ષાઓ હોસ્પિટલ તંત્રને દાન સ્વરૂપે અર્પણ કરવામાં આવી હતી. જોકે, હોસ્પિટલના સત્તાધીશોની બેદરકારીના કારણે દાતાઓના આ પવિત્ર દાનની સરેઆમ અવગણના થઈ રહી છે.

ચાલુ વાહનો બન્યા ભંગાર, દર્દીઓને ઊંચકીને જવા મજબૂર સગાંઓ

હોસ્પિટલ તંત્ર દ્વારા આ દાનમાં મળેલી કિંમતી રિક્ષાઓનો યોગ્ય ઉપયોગ કરવાને બદલે તેને કેમ્પસના એક ખૂણે બિનવારસી હાલતમાં મૂકી દેવામાં આવી છે, જેને કારણે આ વાહનો ખુલ્લામાં ધૂળ ખાઈ રહ્યા છે અને ધીમે-ધીમે ભંગારમાં ફેરવાઈ રહ્યા છે. બીજી તરફ, વ્હીલચેર કે સ્ટ્રેચરની અછત વચ્ચે દર્દીઓના સગાંઓ પોતાના સ્વજનોને હાથમાં અથવા તેડીને એક બિલ્ડિંગથી બીજી બિલ્ડિંગ સુધી દોડવા મજબૂર બન્યા છે. ચાલુ હાલતમાં રહેલા વાહનોનો દર્દીઓ માટે ઉપયોગ ન કરીને તંત્ર દ્વારા દાતાઓની ભાવના અને સરકારી મિલકતનો અનાદર કરવામાં આવી રહ્યો હોવાથી સ્થાનિક લોકો અને સામાજિક કાર્યકરોમાં ભારે રોષ જોવા મળી રહ્યો છે.
​​​​​​​

View this post on Instagram

A post shared by Aajkaal (@aajkaaldaily)