જર્મન વૈજ્ઞાનિકોએ એક ’હીલિંગ પેચ’ વિકસાવ્યો છે જે હાર્ટ એટેકથી ક્ષતિગ્રસ્ત હૃદયને સુધારવામાં મદદરૂપ થઈ શકે છે. વૈજ્ઞાનિકોનો દાવો છે કે આ શોધ એવા દર્દીઓ માટે વરદાન સાબિત થશે જેમને હાર્ટ ટ્રાન્સપ્લાન્ટ અથવા મોંઘા કૃત્રિમ હૃદય પંપ્ની જરૂર છે. ગાર્ડિયનના અહેવાલ મુજબ, જર્મનીના યુનિવર્સિટી મેડિકલ સેન્ટર ગોટીંગેનના સંશોધનમાં જાણવા મળ્યું છે કે વિશ્વભરમાં 6.4 કરોડથી વધુ લોકો હાર્ટ ફેલીયરથી પીડાય છે. આનાથી હૃદયરોગનો હુમલો, હાઈ બ્લડ પ્રેશર અને કોરોનરી ધમની રોગનું જોખમ વધી શકે છે. વૈજ્ઞાનિકોએ જૈવિક ટ્રાન્સપ્લાન્ટ ટેકનોલોજીનો ઉપયોગ કરીને એક પેચ વિકસાવ્યો છે જે હૃદયની સંકોચન ક્ષમતાને પુન:સ્થાપિત કરી શકે છે.
સંશોધકોમાંના એક પ્રોફેસર ઇન્ગો કુત્સ્કાના જણાવ્યા અનુસાર, આ સંશોધનમાં પ્રથમ વખત પ્રયોગશાળામાં વિકસિત જૈવિક ટ્રાન્સપ્લાન્ટનો ઉપયોગ કરવામાં આવ્યો હતો, જે હૃદયના સ્નાયુઓને મજબૂત અને સ્થિર કરવાની ક્ષમતા ધરાવે છે.
વૈજ્ઞાનિકોએ લોહીમાંથી લીધેલા કોષોમાંથી પેચ બનાવ્યો. આ સ્ટેમ સેલ્સની જેમ ફરીથી પ્રોગ્રામ કરવામાં આવે છે. કોષો હૃદયના સ્નાયુ અને જોડાયેલી પેશી કોષોમાં રૂપાંતરિત થાય છે. પછી તેને કોલેજન જેલમાં વિકસાવવામાં આવે છે અને એક ખાસ ઘાટમાં ઢાળવામાં આવે છે. હેક્ઝા પેચો લગભગ પાંચ બાય 10 સેન્ટિમીટરના પટલ પર લગાવવામાં આવે છે.
અભ્યાસના સહ-લેખક પ્રોફેસર વુલ્ફ્રામ-હુબર્ટસ ઝિમરમેનએ જણાવ્યું હતું કે આ પેચ હૃદયની નિષ્ફળતાથી પીડાતા દર્દીઓમાં યુવાન હૃદયના સ્નાયુઓનું પ્રત્યારોપણ કરવા સમાન છે. આ હૃદયની કાર્યક્ષમતામાં સુધારો કરી શકે છે. હૃદયના સ્નાયુમાં સીધા કોષો દાખલ કરવાથી ગાંઠોની રચના અથવા અનિયમિત ધબકારા જેવી સમસ્યાઓ થઈ શકે છે. નવો પેચ આ જોખમોને ઘટાડે છે.