ધંધુકામાં બાઈક ઓવરટેક કરવા જેવી નજીવી બાબતે થયેલી યુવાનની કરપીણ હત્યાએ સમગ્ર પંથકમાં ભારેલા અગ્નિ જેવી સ્થિતિ સર્જી હતી. જોકે, હવે પોલીસ તંત્ર સંપૂર્ણપણે એક્શન મોડમાં આવી ગયું છે. પોલીસે આ હત્યાના બંને મુખ્ય આરોપીઓને ગણતરીના કલાકોમાં ઝડપી પાડી જેલના સળિયા પાછળ ધકેલી દીધા છે. આ સાથે જ સમગ્ર મામલાની તટસ્થ અને ઊંડાણપૂર્વક તપાસ કરવા માટે ઉચ્ચ સ્તરેથી સ્પેશિયલ ઇન્વેસ્ટિગેશન ટીમ (SIT) ની રચના કરવામાં આવી છે.

DySPની અધ્યક્ષતામાં SITની રચના

મામલાની સંવેદનશીલતા અને ગંભીરતાને જોતા રેન્જ આઈજી દ્વારા DySP ની અધ્યક્ષતામાં એક વિશેષ તપાસ ટીમની જાહેરાત કરવામાં આવી છે. આ ટીમમાં અનુભવી અધિકારીઓનો સમાવેશ કરવામાં આવ્યો છે જેઓ હત્યાના મૂળ સુધી પહોંચવા અને મજબૂત પુરાવા એકત્રિત કરવા માટે કામ કરશે. SIT માં નીચે મુજબના અધિકારીઓનો સમાવેશ થાય છે:

પ્રકાશ પ્રજાપતિ - DySP (અધ્યક્ષ)

રઘુ કરમટીયા - PI

કરણ વિહોલ - PI

એસ.એચ. ઝાલા - PSI

તોફાની તત્વો સામે પણ લાલ આંખ

હત્યાની ઘટના બાદ શહેરમાં ફાટી નીકળેલી હિંસા, આગજની અને તોડફોડની ઘટનાઓને પોલીસે અત્યંત ગંભીરતાથી લીધી છે. ઉશ્કેરાયેલા ટોળાએ જાહેર તેમજ ખાનગી મિલકતોને નુકસાન પહોંચાડ્યું હતું, જે મામલે પોલીસે 125 થી વધુ અજાણ્યા લોકો વિરુદ્ધ અલગથી ગુનો દાખલ કર્યો છે. પોલીસ હાલ શહેરના વિવિધ વિસ્તારોના સીસીટીવી ફૂટેજ ચકાસી રહી છે જેથી તોડફોડ કરનારા શખ્સોની ઓળખ કરી તેમની ધરપકડ કરી શકાય.

શાંતિ જાળવવા પોલીસની અપીલ

હાલ ધંધુકામાં પરિસ્થિતિ કાબૂમાં છે અને ચુસ્ત પોલીસ બંદોબસ્ત તૈનાત રાખવામાં આવ્યો છે. પોલીસ દ્વારા સ્થાનિક અગ્રણીઓ સાથે બેઠક કરી શાંતિ જાળવવા અપીલ કરવામાં આવી છે. આરોપીઓ વિરુદ્ધ કડક કાયદાકીય પગલાં લેવાની ખાતરી સાથે તંત્રએ લોકોને કોઈ પણ પ્રકારની અફવાઓ પર ધ્યાન ન આપવા વિનંતી કરી છે.