અમેરિકાના કેલિફોર્નિયામાંથી એક અત્યંત સનસનાટીભર્યા અને હચમચાવી નાખનારા સમાચાર સામે આવ્યા છે. અહીંના સાંત ક્લારા કાઉન્ટી વિસ્તારમાં માત્ર ૯૦ મિનિટના ટૂંકા અંતરાલમાં બે મિત્રોની નિર્દયતાથી હત્યા કરવાના ગંભીર આરોપસર ભારતીય મૂળની ૩૨ વર્ષીય મહિલાની ધરપકડ કરવામાં આવી છે. આ ઘટનાથી સ્થાનિક ભારતીય સમુદાય અને મૃતકોના વતન કેરળમાં ભારે શોક અને આશ્ચર્ય ફેલાઈ ગયું છે.

પ્રાપ્ત વિગતો અનુસાર આરોપી અનિલા બેબી નામના મહિલાએ પોતાની બે સહેલીઓ—એન મેરી મેથ્યુ અને અંજના હરિ—ની હત્યા અલગ-અલગ સ્થળો પર હુમલો કરીને કરી હતી. આ બંને મૃતક યુવતીઓ મૂળ કેરળની રહેવાસી હતી. ગત ૨૮ ઓગસ્ટના રોજ કેલિફોર્નિયાના બે નજીકના શહેરો સાન જોસ અને મિલપિટાસમાં આ ભયાનક અપરાધ આચરવામાં આવ્યો હતો, જે બંને સ્થળો વચ્ચેનું અંતર ૨૦ કિલોમીટરથી પણ ઓછું છે. હુમલાખોરે એક યુવતી પર ચાકુ વડે જીવલેણ હુમલો કર્યો હતો, જ્યારે બીજી સહેલીને કારથી કુચડીને મોતને ઘાટ ઉતારી દીધી હતી.

ઘટનાની જાણ થતાં જ પોલીસ અને તપાસકર્તાઓએ તાત્કાલિક તપાસ શરૂ કરી હતી અને બંને હત્યાઓ વચ્ચેનો સંબંધ અનિલા બેબી સાથે જોડાયેલો હોવાનું બહાર આવ્યું હતું. પોલીસે હત્યાના કલાકોની અંદર જ આરોપી અનિલા બેબીને ઝડપી પાડી હતી અને શરૂઆતમાં મિલપિટાસ હત્યા કેસમાં ગુનો નોંધ્યો હતો. ત્યારબાદ, ૮ સપ્ટેમ્બરના રોજ સરકારી વકીલોએ મેથ્યુની હત્યાના મામલામાં પણ ઉમેરો કર્યો હતો. હાલ પોલીસ દ્વારા આ બેવડા હત્યાકાંડ પાછળના ચોક્કસ હેતુ અને સંજોગોની ઊંડાણપૂર્વક તપાસ ચાલી રહી છે.

​​​​​​​ગુરુવારે આરોપી મહિલાને સાંતા ક્લારા કાઉન્ટી કોર્ટમાં રજૂ કરવામાં આવી હતી. આ કેસની આગામી સુનાવણી આગામી ૧૭ નવેમ્બરે હાથ ધરવામાં આવશે, જ્યાં તેને પોતાનો પક્ષ રાખવાની તક મળશે. જો કોર્ટમાં તેનો ગુનો સાબિત થાય છે, તો તેને ૫૦ વર્ષથી લઈને આજીવન કેદ સુધીની કઠોર સજા થઈ શકે છે.