પડધરીના ખોડાપીપર ગામે સરકારી જમીનમાં દબાણ કરી પાંચ દુકાનો ચણી નાખી ભાડે આપી દેવાઇ હતી. જે અંગે મામલતદારે પડધરી પોલીસ મથકમાં ફરિયાદ નોંધાવતા પોલીસે એન્ટી લેન્ડ ગ્રેબિંગ એકટ હેઠળ ગુનો નોંધી કાયદેસરની કાર્યવાહી કરી હતી. પડધરીના મામલતદાર કે.જી.સખીયાએ આરોપી તરીકે ભરત સુરેશભાઈ ડાવેરા (રહે. ખોડાપીપર, પડધરી, રાજકોટ)નું નામ આપ્યું છે. મામલતદારે ફરીયાદ નોંધાવતા જણાવ્યું હતું કે, રાજકોટ જિલ્લા કલેક્ટરની અધ્યક્ષતામાં મળેલી બેઠકમાં ખોડાપીપર ગામના મહેસુલી તલાટી તથા સર્કલ ઓફિસર દ્વારા ફેરણી કરતાં ખોડાપીપર ગામના ભરત સુરેશભાઈ ડાવેરાએ પડધરી તાલુકાના ખોડાપીપર ગામના સરકારી ખરાબાના સર્વે નં.૧૩૭ પૈકી ૨ ની જમીનમાં ગેરકાયદેદબાણ કરી પાંચ દુકાનો બનાવી ભાડે ચડાવી આર્થિક ઉપાર્જન કરતા હોવાનું જણાવ્યું હતું. જેથી સરકારી જમીન પર દબાણ કરનાર વિરુદ્ધ તા. ૦૭/૦૨/૨૦૨૬ થી સાધનિક કાગળો તૈયાર કરી ગુજરાત જમીન પચાવી પાડવા પર (પ્રતિબંધ) અધિનિયમ-૨૦૨૦ હેઠળ પગલાં લેવા અભિપ્રાય સાથે દરખાસ્ત રજુ કરવામાં આવી હતી. તા. ૧૧/૦૨/૨૦૨૬ થી પ્રાંત અધિકારી રાજકોટ ગ્રામ્યને આ મામલે વિગતવાર દરખાસ્ત કરતાં તેઓની કચેરી પત્ર તા.૨૧/૦૨/૨૦૨૬ થી સરકારી જમીનમાં દબાણ બાબતે સુઓમોટો લેન્ડ ગ્રેબિંગ એક્ટ હેઠળ કાર્યવાહી કરવા તા.૧૮/૦૭/૨૦૨૬ ના રોજ મળેલી બેઠકમાં ભરત સુરેશભાઈ ડાવેરા વિરૂધ્ધ ગુનો નોંધાવવા સમિતી દ્વારા નિર્ણય લેવામાં આવ્યો હતો. જેથી મામલતદારે ફરિયાદી બની પડધરી પોલીસ મથકે સરકારી જમીનમાં દબાણ કરી પાંચ દુકાન ખડકી ભાડે ચડાવી આર્થિક ઉપાર્જન કરતા શખસ વિરુદ્ધ ફરીયાદ નોંધાવી હતી