નાસા અને ઈસરોના એક્સિઓમ-૪ મિશનનું લોન્ચિંગ ફરી એકવાર મુલતવી રાખવામાં આવ્યું છે. આ મિશન ૧૯ જૂને એટલેકે આવતીકાલે ઈન્ટરનેશનલ સ્પેસ સ્ટેશન (આઈએસએસ ) માટે રવાના થવાનું હતું. પરંતુ હવે તે ૨૨ જૂને લોન્ચ કરવામાં આવશે.

તાજેતરમાં, આઈએસએસના સર્વિસ મોડ્યુલના પાછળના ભાગમાં સમારકામનું કામ ચાલી રહ્યું હતું. આવી સ્થિતિમાં, નાસા સ્પેસ સ્ટેશનનું સંપૂર્ણ મૂલ્યાંકન કર્યા પછી જ એક્સિઓમ-૦૪ મિશન લોન્ચ કરશે.

આ મિશન ઈસરો, નાસા, એક્સિઓમ સ્પેસ અને સ્પેસએક્સના સંયુક્ત પ્રયાસોથી લોન્ચ કરવામાં આવશે. જોકે તે ખૂબ પહેલા લોન્ચ થવાનું હતું, પરંતુ ફાલ્કન-9 રોકેટમાં પ્રવાહી ઓક્સિજન લીકેજ બાદ, આ મિશન ૧૯ જૂન સુધી મુલતવી રાખવામાં આવ્યું હતું. તે જ સમયે, હવે આ મિશન ૨૨ જૂને લોન્ચ કરવામાં આવશે.

એક્સિઓમ સ્પેસએ સોશિયલ મીડિયા પ્લેટફોર્મ એક્સ પર એક પોસ્ટ શેર કરી અને એક્સિઓમ-૪ ના ક્રૂ સભ્યો વિશે માહિતી આપી. નાસાના ભૂતપૂર્વ અવકાશયાત્રી અને માનવ અવકાશ ઉડાનના નિર્દેશક પેગી વ્હિટસન આ મિશનના કમાન્ડર હશે. ઇસરોના ભારતીય અવકાશયાત્રી શુભાંશુ શુક્લા કમાન્ડર તરીકે આ મિશનનો ભાગ હશે. આ ઉપરાંત, યુરોપિયન સ્પેસ એજન્સીના મિશન નિષ્ણાતો સ્લેવોજ ઉઝનાન્સ્કી વિસ્નીવસ્કી અને ટિબોર કાપુ તબીબી અને સલામતી ધોરણોનું ધ્યાન રાખશે.

તમામ તબીબી અને સલામતી પ્રોટોકોલનું પાલન કરીને, એએક્સ-4 ના ક્રૂ સભ્યોને ફ્લોરિડામાં ક્વોરેન્ટાઇન કરવામાં આવ્યા છે. ક્રૂનું સ્વાસ્થ્ય સારું છે અને મિશનના લોન્ચની રાહ જોઈ રહ્યા છે. આ મિશન ફ્લોરિડામાં નાસાના કેનેડી સ્પેસ સેન્ટરથી લોન્ચ કરવામાં આવશે. સ્પેસએક્સનું ડ્રેગન અવકાશયાન તમામ અવકાશયાત્રીઓને આઈએસએસ પર લઈ જશે.

આ મિશન ભારત માટે ખૂબ જ ઐતિહાસિક સાબિત થશે. શુભાંશુ શુક્લા ૧૯૮૪ પછી અવકાશમાં જનારા બીજા ભારતીય હશે. આ મિશન દરમિયાન, શુભાંશુ શુક્લા નાસા સાથે મળીને ૭ પ્રકારના વૈજ્ઞાનિક પ્રયોગો કરશે. શુભાંશુ શુક્લાનો આ અનુભવ ઈસરોના ગગનયાન મિશનમાં મદદરૂપ સાબિત થશે.