રાષ્ટ્રીય હવામાન સેવાએ ગુરુવારે અમેરિકાના દક્ષિણ અને મધ્ય-પશ્ચિમમાં પૂરની ચેતવણી આપી છે. ટેક્સાસથી મિશિગન સુધી દેશના મોટા ભાગમાં પહેલાથી જ તોફાને તબાહી મચાવી છે. જેમાં ઘણા લોકો ઘાયલ થયા હોવાના સમાચાર છે. તોફાનથી ઘણા ઘરો અને ધંધા તબાહ થઈ ગયા છે અને લાખો ઘરોની વીજળી ગુલ થઈ ગઈ છે.

અમેરિકાના દક્ષિણ અને મધ્ય પશ્ચિમ વિસ્તારના ઘણા વિસ્તારોમાં ભીષણ તોફાનના કારણે ઘણા ઘરોના છાપરા ઉડી ગયા છે, વીજળીના થાંભલા અને વૃક્ષો ધરાશાયી થયા છે. જેના કારણે લાખો ઘરોની વીજળી ગુલ થઈ ગઈ છે. એક વ્યક્તિના મોત અને કેટલાક લોકો ઘાયલ થયા હોવાના સમાચાર છે.

ઇલિનોઇસ, અરકાનસાસ, ઇન્ડિયાના, મિઝોરી અને મિસિસિપીના કેટલાક ભાગોમાં બુધવારે સાંજે ભીષણ તોફાન અને વંટોળિયાને લઈને ડઝનેક ચેતવણીઓ જારી કરવામાં આવી હતી. જ્યારે ઉત્તર-પૂર્વ અરકાનસાસમાં તોફાનના કારણે થોડા સમય માટે કટોકટી જાહેર કરવામાં આવી હતી.

પૂરનો પણ ખતરો

ઇલિનોઇસ, અરકાનસાસ, મિઝોરી, મિસિસિપી અને ટેનેસીમાં 90 હજારથી વધુ ઘરોની વીજળી ગુલ થઈ ગઈ છે. જ્યારે ઇન્ડિયાનામાં પણ બુધવારે રાત્રે 182,000 ઘરોમાં વીજળી નહોતી. આગામી દિવસોમાં દક્ષિણ અને મધ્ય પશ્ચિમમાં પૂરનો ખતરો પણ વ્યક્ત કરવામાં આવ્યો છે, કારણ કે પૂર્વ તરફ આગળ વધી રહેલું તોફાન વિકરાળ બની રહ્યું છે.

રાષ્ટ્રીય હવામાન સેવાએ કહ્યું કે શનિવાર સુધી પૂરનો ખતરો રહેશે. આગામી ચાર દિવસમાં 30 સેન્ટિમીટરથી વધુ વરસાદની સંભાવના છે. તોફાનની આગાહી કેન્દ્ર અનુસાર, ટેક્સાસથી મિનેસોટા અને મેઈન સુધી દેશના મોટા ભાગમાં રહેતા લગભગ નવ કરોડ લોકોને ખરાબ હવામાનનો સામનો કરવો પડી શકે છે.