ઓસ્ટ્રેલિયાના પર્થ શહેરમાં શુક્રવારની સવારે એક અત્યંત દર્દનાક અને ભયાનક ઘટના સામે આવી છે. પર્થ સ્થિત સોરેન્ટો બીચ પર દરિયામાં સ્વિમિંગ કરી રહેલા 63 વર્ષીય તરવૈયા ગ્રેગ ઓ'નીલ પર એક વિશાળ 'ગ્રેટ વ્હાઇટ શાર્ક' એ જીવલેણ હુમલો કર્યો હતો. આ ભયાનક દુર્ઘટનામાં ગ્રેગનું કરુણ મોત નીપજ્યું છે. બીબીસીના અહેવાલ મુજબ, ઘટના બનતાં જ પોલીસ અને કોસ્ટ ગાર્ડે હેલિકોપ્ટર તથા બોટની મદદથી શોધખોળ હાથ ધરી હતી, પરંતુ હજુ સુધી તેમનો મૃતદેહ મળી શક્યો નથી. સુરક્ષાના કારણોસર આસપાસના તમામ બીચ રવિવાર સુધી બંધ કરી દેવાયા છે.

મળતી માહિતી મુજબ, ગ્રેગ ઓ'નીલ પોતાના એક નજીકના મિત્ર સાથે દૈનિક નિયમ મુજબ દરિયામાં તરણ માટે ગયા હતા. સોરેન્ટો કિનારાથી માત્ર 15 મીટરના અંતરે જ શાર્કે તેમના પર અચાનક હુમલો કરી દીધો હતો. બીચ પર હાજર અનેક લોકોએ આ ખૌફનાક દ્રશ્ય પોતાની નજરે જોયું હતું. તેમની સાથે તરી રહેલો મિત્ર આ હુમલામાં આબાદ બચી ગયો હતો, પરંતુ પોતાના મિત્રને બચાવી ન શકવાના કારણે તે ઊંડા આઘાતમાં સરી પડ્યો છે. પીડિત પરિવારે ગ્રેગને એક અત્યંત ઉદાર, સમર્પિત કૌટુંબિક વ્યક્તિ અને પ્રકૃતિપ્રેમી ગણાવી ભારે શોક વ્યક્ત કર્યો છે.

આ ભયાનક ઘટના બાદ પશ્ચિમ ઓસ્ટ્રેલિયાના મત્સ્યોદ્યોગ મંત્રી જેકી જાર્વિસે એક અભૂતપૂર્વ અને કડક નિર્ણય લેતાં હુમલો કરનાર શાર્કને પકડીને મારી નાખવાના આદેશ (Kill Order) પર હસ્તાક્ષર કર્યા છે. વોટર પોલીસે હુમલામાં સામેલ આ શાર્કની સ્પષ્ટ ઓળખ કરી લીધી હોવાથી આ આદેશ આપવામાં આવ્યો છે. પશ્ચિમ ઓસ્ટ્રેલિયામાં છેલ્લા 10 વર્ષમાં આ પ્રકારનો 'કેચ એન્ડ કિલ' આદેશ જારી કરવામાં આવ્યો હોય તેવી આ પ્રથમ ઘટના છે.

​​​​​​​ઓસ્ટ્રેલિયામાં ગ્રેટ વ્હાઇટ શાર્ક એક સંરક્ષિત પ્રજાતિ હોવાના કારણે આ નિર્ણયની આસપાસ વિવાદ સર્જાયો છે. જોકે, મંત્રી જેકી જાર્વિસે સ્પષ્ટતા કરી છે કે હુમલાની ગંભીરતા, નાગરિકોની સુરક્ષા પર ઊભું થયેલું જોખમ અને તપાસ અધિકારીઓ માટે પુરાવા એકત્રિત કરવાની જરૂરિયાતને ધ્યાનમાં રાખીને આ અસાધારણ પગલું ભરવામાં આવ્યું છે. તેમણે લોકોને આશ્વાસન આપ્યું છે કે આ કોઈ વ્યાપક સ્તરે શાર્કને મારવાનું અભિયાન નથી પરંતુ ચોક્કસ જોખમને ટાળવાનો એક ઉપાય છે.