કોલકાતા: પશ્ચિમ બંગાળની સત્તાનો તાજ કોના શિરે જશે તેનો ફેંસલો આજે થવા જઈ રહ્યો છે. રાજ્યની 293 બેઠકો પર આજે સવારે કડક સુરક્ષા વચ્ચે મતગણતરીનો પ્રારંભ થઈ ચૂક્યો છે. શરૂઆતી તબક્કામાં અત્યારે પોસ્ટલ બેલેટની ગણતરી કરવામાં આવી રહી છે, જે બાદ સવારે 8:30 વાગ્યાથી EVM ખુલશે.

શરૂઆતી વલણો: મમતા vs ભાજપ

9.51 વાગ્યે

પશ્ચિમ બંગાળમાં પરિણામમાં કાંટાની ટક્કરઃ ભાજપ 103 અને ટીએમસી 103 બેઠક પર આગળઃ આસામ અને પુડુચેરીમાં ભાજપ આગળ, કેરળમાં કોંગ્રેસ અને તમિલનાડુમાં ડીએમકે આગળ

9.45 વાગ્યે

પશ્ચિમ બંગાળમાં પરિણામમાં કાંટાની ટક્કરઃ ભાજપ 90 અને ટીએમસી 88 બેઠક પર આગળઃ આસામ અને પુડુચેરીમાં ભાજપ આગળ, કેરળમાં કોંગ્રેસ અને તમિલનાડુમાં ડીએમકે આગળ

આ આંકડાઓ દર્શાવે છે કે મમતા બેનર્જીના ગઢમાં ગાબડું પાડવા ભાજપે પૂરી તાકાત લગાવી છે, જ્યારે મમતા બેનર્જી પોતાની સત્તા જાળવી રાખવા મક્કમ છે. નોંધનીય છે કે ફાલ્ટા બેઠક પર કેટલીક ટેકનિકલ ખામીઓ અથવા અનિવાર્ય કારણોસર 21 મેના રોજ ફરીથી મતદાન યોજાશે.

ભવાનીપુરમાં હંગામો: એજન્ટો વચ્ચે ઝપાઝપી

મતગણતરી શરૂ થાય તે પહેલા જ રાજ્યમાં રાજકીય ગરમાવો જોવા મળ્યો હતો. સવારે 6:30 વાગ્યે ભવાનીપુરની સખાવત મેમોરિયલ સ્કૂલ બહાર TMC અને ભાજપના એજન્ટો સામસામે આવી ગયા હતા. બંને પક્ષો વચ્ચે ઉગ્ર બોલાચાલી બાદ ઝપાઝપી થઈ હતી, જેના કારણે સ્થિતિ તંગ બની ગઈ હતી.

ભવાનીપુર બેઠક આ આખી ચૂંટણીનું કેન્દ્રબિંદુ છે, કારણ કે અહીંથી મુખ્યમંત્રી મમતા બેનર્જી અને તેમના કટ્ટર હરીફ બનેલા સુવેન્દુ અધિકારી સામસામે મેદાનમાં છે. આ હાઈ-પ્રોફાઈલ જંગ પર સમગ્ર દેશની નજર ટકેલી છે.

ઐતિહાસિક જંગ: શું મમતા ચોથી વાર વાપસી કરશે?

પશ્ચિમ બંગાળમાં છેલ્લા 15 વર્ષથી મમતા બેનર્જીનું શાસન છે. આ વખતે તેમની સામે સૌથી મોટો પડકાર ભાજપ તરફથી મળી રહ્યો છે.

"આ માત્ર ચૂંટણી નથી, પણ બંગાળની ઓળખ અને અસ્તિત્વની લડાઈ છે." - રાજકીય વિશ્લેષકો

મુખ્ય મુદ્દાઓ

ચોથી ટર્મ: શું મમતા બેનર્જી સતત ચોથી વખત મુખ્યમંત્રી બનીને ઈતિહાસ રચશે?

ભાજપનો ઉદય: શું ભાજપ પહેલીવાર બંગાળમાં ભગવો લહેરાવીને સત્તાના સમીકરણો બદલશે?

હિંસાની આશંકા: મતગણતરી દરમિયાન કોઈ અનિચ્છનીય ઘટના ન બને તે માટે કેન્દ્રીય દળોની ભારે તૈનાતી કરવામાં આવી છે.

બંગાળની જનતાએ પરિવર્તન સ્વીકાર્યું છે કે પછી 'દીદી' પર ભરોસો કાયમ રાખ્યો છે, તેનો સ્પષ્ટ જવાબ આગામી થોડા કલાકોમાં મળી જશે. અત્યારે તો દરેક રાઉન્ડની ગણતરી સાથે ધબકારા વધી રહ્યા છે.