ઉલ્લેખનીય છે કે ભારતની આર્થિક રાજધાની મુંબઈ પર 2008માં થયેલા આતંકવાદી હુમલાના માસ્ટરમાઇન્ડ તહવ્વુર રાણાને તાજેતરમાં ભારત લાવવામાં આવ્યો હતો. હાલમાં, તે એનઆઈએ કસ્ટડીમાં છે. ભારત છેલ્લા 17 વર્ષથી રાણા અને તેના સાથી ડેવિડ કોલમેન હેડલીના પ્રત્યાર્પણ માટે પ્રયાસ કરી રહ્યું હતું, જેમની 2009માં અમેરિકામાં ધરપકડ કરવામાં આવી હતી. હેડલીના કેસમાં ભારતને અત્યાર સુધી કોઈ ખાસ સફળતા મળી નથી, પરંતુ તહવ્વુર રાણાના કેસમાં, અમેરિકાની નીચલી અદાલતો, સુપ્રીમ કોર્ટ અને રાષ્ટ્રપતિ ડોનાલ્ડ ટ્રમ્પે ભારતના દાવાઓને સ્વીકાર્યા અને તેમના પ્રત્યાર્પણને મંજૂરી આપી.

એવો દાવો કરવામાં આવે છે કે તહવ્વુર રાણાએ ડેવિડ હેડલીને તેની કન્સલ્ટન્સી ફર્મ્સમાં પણ નોકરી આપી હતી. ડેવિડ હેડલી આ પેઢીની મુંબઈ શાખાના કામ માટે મુંબઈ આવ્યો હતો અને લશ્કર-એ-તૈયબાના આતંકવાદી હુમલાની તૈયારી માટે તેણે તાજમહેલ હોટેલ અને છત્રપતિ શિવાજી ટર્મિનસ જેવા મુંબઈના મહત્વપૂર્ણ સ્થળોની રેકી કરી હતી.

તપાસકર્તાઓનું માનવું છે કે તહવ્વુર રાણાએ એક કન્સલ્ટન્સી ફર્મની આડમાં ડેવિડ હેડલી પાસેથી સમગ્ર રેકીનું કામ કરાવ્યું હતું. વર્ષ 2008માં, પાકિસ્તાનના આતંકવાદી સંગઠન લશ્કર-એ-તૈયબાના 10 આતંકવાદીઓએ મુંબઈમાં ઘૂસીને આખા શહેર પર હુમલો કર્યો હતો. આ ક્રૂર હુમલાઓમાં છ અમેરિકન નાગરિકો અને કેટલાક યહૂદીઓ સહિત ૧૬૬ લોકો માર્યા ગયા હતા.

એનઆઈએએ અન્ય ભારતીય ગુપ્તચર એજન્સીઓ, એનએસજી સાથે મળીને સમગ્ર પ્રત્યાર્પણ પ્રક્રિયા હાથ ધરી હતી. ભારત-અમેરિકા પ્રત્યાર્પણ સંધિ હેઠળ એનઆઈએએ દ્વારા શરૂ કરાયેલી ન્યાયિક કાર્યવાહીના આધારે રાણાને અમેરિકામાં અટકાયતમાં લેવામાં આવ્યો હતો. રાણાની અનેક કાનૂની અપીલો અને યુએસ સુપ્રીમ કોર્ટમાં કરાયેલી કટોકટીની અરજી ફગાવી દેવામાં આવ્યા બાદ પ્રત્યાર્પણ શક્ય બન્યું. તેને યુ.એસ. ડિપાર્ટમેન્ટ ઓફ જસ્ટિસના ઇન્ટરનેશનલ અફેર્સ ઓફિસ, સેન્ટ્રલ ડિસ્ટ્રિક્ટ ઓફ કેલિફોર્નિયા માટે યુ.એસ. એટર્ની ઓફિસ, યુ.એસ. માર્શલ્સ સર્વિસ, એફબીઆઈના નવી દિલ્હી સ્થિત લીગલ એટેચી અને યુ.એસ. ડિપાર્ટમેન્ટ ઓફ સ્ટેટના કાયદા અમલીકરણ માટેના લીગલ એડવાઇઝર દ્વારા સક્રિયપણે સમર્થન આપવામાં આવ્યું હતું. ભારતના વિદેશ મંત્રાલય અને ગૃહ મંત્રાલયના સતત પ્રયાસોને કારણે, ભાગેડુ રાણા માટે પ્રત્યાર્પણ વોરંટ મેળવવામાં આવ્યું. વિશ્વના કોઈપણ ખૂણામાંથી આતંકવાદમાં સામેલ વ્યક્તિઓને ન્યાયના કઠેડામાં લાવવા માટે ભારત માટે આ એક મહત્વપૂર્ણ પગલું હતું.