આઈપીએલ ૨૦૨૬ (IPL 2026) ના ૧૯મા સીઝનની રોમાંચક જંગ હવે તેના અંતિમ પડાવ પર પહોંચી ગઈ છે. ન્યૂ ચંદીગઢના મુલ્લાંપુર સ્ટેડિયમમાં રમાયેલા હાઈ-વોલ્ટેજ ‘એલિમિનેટર’ મુકાબલામાં સનરાઈઝર્સ હૈદરાબાદને ૪૭ રનથી માત આપીને સંજુ સેમસનની કપ્તાનીવાળી રાજસ્થાન રોયલ્સે ક્વોલિફાયર-૨ માં પોતાનું સ્થાન પાકું કરી લીધું છે. આ જીત સાથે જ રાજસ્થાન ખિતાબ જીતવાની પ્રબળ દાવેદાર તો બની ગઈ છે, પરંતુ આંકડા અને ઇતિહાસ એ વાતની ગવાહી આપે છે કે રાજસ્થાન માટે ટ્રોફી સુધી પહોંચવાનો રસ્તો અત્યંત કાંટાળો અને મુશ્કેલ છે.

આઈપીએલ ૨૦૨૬ માં હવે માત્ર બે જ મહાજંગ બાકી રહ્યા છે. ૨૯ મેના રોજ ક્વોલિફાયર-૨ માં રાજસ્થાન રોયલ્સનો સામનો ગુજરાત ટાઇટન્સ સામે થશે. આ મેચમાં જે ટીમ જીતશે, તે ૩૧ મેના રોજ અમદાવાદના નરેન્દ્ર મોદી સ્ટેડિયમમાં રમાનારી ગ્રાન્ડ ફિનાલે (ફાઇનલ) માં ડિફેન્ડિંગ ચેમ્પિયન રોયલ ચેલેન્જર્સ બેંગલુરુ (RCB) સામે ટ્રોફી માટે ટકરાશે.

એલિમિનેટરનો ‘અશુભ’ ઇતિહાસ: ૧૮ સીઝનમાં માત્ર ૧ વાર બન્યો છે ચમત્કાર
આઈપીએલના ઇતિહાસમાં વર્ષ ૨૦૧૧ થી પ્લેઓફ (પેજ પ્લેઓફ સિસ્ટમ) ની શરૂઆત થઈ હતી. ત્યારથી અત્યાર સુધીના ઇતિહાસ પર નજર કરીએ તો, પોઈન્ટ્સ ટેબલમાં ત્રીજા કે ચોથા સ્થાને રહીને ‘એલિમિનેટર’ મેચ રમનારી ટીમ માટે ચેમ્પિયન બનવું લગભગ અશક્ય સાબિત થયું છે.

માત્ર એક જ અપવાદ
આઈપીએલના ઇતિહાસમાં અત્યાર સુધી માત્ર એક જ વાર એવું બન્યું છે કે એલિમિનેટર રમનારી ટીમે ટ્રોફી જીતી હોય. વર્ષ ૨૦૧૬ માં ડેવિડ વોર્નરની કપ્તાની હેઠળ સનરાઈઝર્સ હૈદરાબાદે આ કરિશ્મા કર્યો હતો. તે સીઝનમાં હૈદરાબાદે એલિમિનેટરમાં પહેલા KKR ને હરાવ્યું, પછી ક્વોલિફાયર-૨ માં ગુજરાત લાયન્સને માત આપી અને ફાઇનલમાં RCB ને ૮ રનથી હરાવીને ટ્રોફી જીતી હતી.

રાજસ્થાન સામે પડકાર 
હવે ૧૦ વર્ષ બાદ રાજસ્થાન રોયલ્સ સામે ૨૦૧૬ ના એ ઇતિહાસને પુનરાવર્તિત કરવાનો મોટો પડકાર છે. જો રાજસ્થાનને બીજી વાર ચેમ્પિયન બનવું હોય (પ્રથમ વાર ૨૦૦૮ માં શેન વોર્નની કપ્તાનીમાં જીત્યું હતું), તો તેમણે બેક-ટુ-બેક ત્રણ નોકઆઉટ મેચો જીતવી પડશે, જેમાંથી એક તેઓ જીતી ચૂક્યા છે.

ગુજરાત ટાઇટન્સ સામે શરમજનક રેકોર્ડ
રાજસ્થાન રોયલ્સ માટે ફાઇનલમાં પહોંચવાનો રસ્તો રોકનાર સૌથી મોટો અવરોધ ગુજરાત ટાઇટન્સ છે. આઈપીએલના ઇતિહાસમાં ગુજરાત સામે રાજસ્થાનનો ટ્રેક રેકોર્ડ ઘણો ખરાબ રહ્યો છે:

હેડ-ટુ-હેડ આંકડા
બંને ટીમો વચ્ચે અત્યાર સુધીમાં કુલ ૧૦ આઈપીએલ મેચ રમાઈ છે. આ ૧૦ મુકાબલામાંથી ગુજરાત ટાઇટન્સે આક્રમક પ્રદર્શન કરતા ૭ મેચમાં જીત મેળવી છે, જ્યારે રાજસ્થાન રોયલ્સ માત્ર ૩ મેચ જ જીતી શક્યું છે.

ચાલુ સીઝનનું સમીકરણ
આઈપીએલ ૨૦૨૬ ના વર્તમાન સીઝનની લીગ સ્ટેજમાં બંને ટીમો વચ્ચે ૨ મેચ રમાઈ હતી, જેમાં બંને ટીમો ૧-૧ મેચ જીતીને બરાબરી પર રહી છે. રાજસ્થાન રોયલ્સ પાસે શાનદાર બેટિંગ લાઇન-અપ અને ઘાતક બોલિંગ એટેક છે, પરંતુ ઇતિહાસના આ કડવા આંકડા અને ગુજરાત ટાઇટન્સનો પલડો ભારે હોવાના કારણે ૨૯ મેના રોજ ન્યૂ ચંદીગઢમાં રમાનારો ક્વોલિફાયર-૨ નો મુકાબલો સખત રસાકસીભર્યો રહેશે. શું રાજસ્થાન ઇતિહાસ બદલી શકશે કે પછી ગુજરાત ફરી એકવાર ફાઇનલમાં એન્ટ્રી કરશે, તેના પર તમામ ક્રિકેટ રસિયાઓની નજર ટકેલી છે.