જમ્મુ અને કાશ્મીરના સોનમર્ગમાં એક મોટું હિમસ્ખલન થયું હતું.હિમસ્ખલનથી સ્થાનિકોમાં ગભરાટ ફેલાયો છે. જોકે, રાહતની વાત એ છે કે હિમસ્ખલન ખતરનાક હોવા છતાં, કોઈ જાનહાનિ કે સંપત્તિને નુકસાન થયાના અહેવાલ નથી.સોશિયલ મીડિયા પર ફરતા એક વીડિયોમાં પર્વતીય પ્રદેશમાં અચાનક બરફનું તોફાન જોવા મળે છે. અધિકારીઓએ જણાવ્યું હતું કે મધ્ય કાશ્મીરના ગાંદરબલ જિલ્લાના સોનમર્ગ રિસોર્ટમાં મંગળવારે રાત્રે 10:12 વાગ્યે હિમસ્ખલન થયું હતું. બચાવ ટીમો ઘટનાસ્થળે રવાના કરવામાં આવી છે. અધિકારીઓએ જણાવ્યું હતું કે તેઓ પરિસ્થિતિ પર નજર રાખી રહ્યા છે.

સોનમર્ગમાં હિમસ્ખલનના પગલે વહીવટીતંત્રે વિસ્તારમાં રહેતા લોકોને સાવધાની રાખવા વિનંતી કરી છે. ગયા વર્ષે માર્ચ મહિનામાં જમ્મુ અને કાશ્મીરના ગુલમર્ગમાં પણ એક મોટો હિમસ્ખલન થયો હોવાના અહેવાલ છે. આ હિમસ્ખલન ગાંદરબલના સોનામર્ગના સરબલ વિસ્તારમાં થયું હતું. અચાનક હિમસ્ખલન એક ટ્રકને તાણીગયું હતું. હિમસ્ખલનથી વિસ્તારના રહેવાસીઓ ભયભીત થઈ ગયા છે.

૧૧ જિલ્લાઓમાં હિમસ્ખલનની ચેતવણી

જમ્મુ અને કાશ્મીર કેન્દ્રશાસિત પ્રદેશ ડિઝાસ્ટર મેનેજમેન્ટ ઓથોરિટીએ કાશ્મીરના અગિયાર જિલ્લાઓ, જેમાં ગાંદરબલ, અનંતનાગ, બાંદીપોરા, બારામુલ્લા, કુલગામ અને કુપવાડાનો સમાવેશ થાય છે, અને જમ્મુ ક્ષેત્રના ડોડા, કિશ્તવાર, પૂંચ, રાજૌરી અને રામબન માટે હિમસ્ખલનની ચેતવણી જારી કરી છે. આ સતત હિમવર્ષાને કારણે, કાઝીગુંડ અને બનિહાલ વચ્ચે બરફ જમા થવાને કારણે શ્રીનગર-જમ્મુ રાષ્ટ્રીય ધોરીમાર્ગ ટ્રાફિક માટે બંધ થઈ ગયો હતો. બરફ હટાવવાનું કામ ચાલુ હોવા છતાં હાઇવે પર ટ્રાફિકને મંજૂરી આપવામાં આવી ન હતી.

ખાસ કંટ્રોલ રૂમ શરુ

અધિકારીઓએ જણાવ્યું હતું કે હિમવર્ષાને કારણે ટ્રેન સેવાઓ પણ પ્રભાવિત થઈ હતી. બનિહાલ અને બડગામ વચ્ચે કેટલીક ટ્રેનો રદ કરવામાં આવી હતી. પાટા સાફ થયા પછી થોડા કલાકો પછી કામગીરી ફરી શરૂ થઈ. જિલ્લા વહીવટીતંત્ર અને પોલીસે જનતાને મદદ કરવા માટે કંટ્રોલ રૂમ અને હેલ્પલાઇન નંબરો સ્થાપિત કર્યા છે. હવામાન વિભાગે મોટાભાગના વિસ્તારોમાં હળવો થી મધ્યમ વરસાદ અથવા હિમવર્ષા અને કેટલાક વિસ્તારોમાં વાવાઝોડા અથવા ભારે પવનની આગાહી કરી છે. બુધવારે પણ હળવો વરસાદ થવાની સંભાવના છે.