ઈરાનના વિદેશ મંત્રી અબ્બાસ અરાઘચીએ એક મહત્વના ઈન્ટરવ્યુમાં જણાવ્યું છે કે, હોર્મુઝની ખાડી આંતરરાષ્ટ્રીય જહાજો માટે બંધ કરવામાં આવી નથી. જોકે, તેમણે સ્પષ્ટ ચેતવણી આપી છે કે અમેરિકા અને ઈઝરાયેલ સાથે જોડાયેલા કોઈપણ જહાજને આ માર્ગ પરથી પસાર થવા દેવામાં આવશે નહીં.

વ્યૂહાત્મક 'ચોકપોઈન્ટ' પર ઈરાનનું નિયંત્રણ
હોર્મુઝની ખાડી ઈરાન અને ઓમાન વચ્ચે આવેલી એક સાંકડી સમુદ્રી પટ્ટી છે, જે પર્સિયન ગલ્ફને અરબી સમુદ્ર સાથે જોડે છે. વિશ્વના કુલ તેલ નિકાસનો મોટો હિસ્સો આ માર્ગેથી પસાર થાય છે, તેથી તેનું મહત્વ અનેકગણું છે. અરાઘચીએ જણાવ્યું કે અન્ય દેશોના જહાજો આ રૂટનો ઉપયોગ કરી રહ્યા છે, પરંતુ સુરક્ષાના કારણોસર ઘણી કંપનીઓએ અત્યારે આ વિસ્તારથી અંતર જાળવી રાખ્યું છે.

હુમલાની ચેતવણી 
ઈરાને ચીન અને ભારતીય જહાજોને મર્યાદિત મંજૂરી આપી છે, પરંતુ જો અમેરિકા તેહરાનના તેલ માળખા પર હુમલો કરશે, તો ઈરાન સમગ્ર ગલ્ફ વિસ્તારની ઓઈલ ફેસિલિટીઝ પર પ્રહાર કરશે.

નેતૃત્વ અંગેની અફવાઓનું ખંડન
ઈરાની વિદેશ મંત્રીએ ઈરાનના નેતૃત્વમાં અસ્થિરતા હોવાના અમેરિકી દાવાઓને ફગાવી દીધા છે. અમેરિકી સંરક્ષણ મંત્રી પીટ હેગસેથના એ દાવાને તેમણે નકારી કાઢ્યો છે જેમાં કહેવાયું હતું કે ઈરાનના નવા નિયુક્ત સુપ્રીમ લીડર મોજતબા ખમેની ઘાયલ થયા છે. અરાઘચીએ ભારપૂર્વક કહ્યું કે ઈરાનનું રાજકીય માળખું કોઈ એક વ્યક્તિ પર નિર્ભર નથી અને બધું જ નિયંત્રણ હેઠળ છે.

પરમાણુ હથિયારો અને યુરેનિયમનો મુદ્દો
અરાઘચીએ સ્પષ્ટતા કરી છે કે ઈરાન પાસે હાલમાં 60 ટકા શુદ્ધતા ધરાવતું 440 કિલોગ્રામ યુરેનિયમ છે. આ આંકડો તેમણે વાટાઘાટોમાં એક મજબૂત પક્ષ તરીકે રજૂ કર્યો હતો. જોકે, તેમણે અમેરિકાના એવા દાવાને નકારી દીધો હતો કે ઈરાને પરમાણુ બોમ્બ બનાવવાની સીધી ધમકી આપી છે.

ટ્રમ્પનું આક્રમક વલણ
બીજી તરફ, અમેરિકી રાષ્ટ્રપતિ ડોનાલ્ડ ટ્રમ્પે આ સ્થિતિનો સામનો કરવા માટે વૈશ્વિક મોરચો ખોલવાની તૈયારી કરી છે. ટ્રમ્પે ચીન, ફ્રાન્સ, જાપાન, દક્ષિણ કોરિયા અને બ્રિટન જેવા દેશોને હોર્મુઝની ખાડીમાં તેમના યુદ્ધ જહાજો તૈનાત કરવા વિનંતી કરી છે, જેથી ઈરાનના ખતરાને રોકી શકાય. ટ્રમ્પે દાવો કર્યો છે કે ઈરાન અત્યારે કરાર કરવા માંગે છે, પરંતુ શરતો પૂરતી મજબૂત ન હોવાથી અમેરિકા અત્યારે કોઈ ઉતાવળમાં નથી. હોર્મુઝમાં વધતી જતી આ સૈન્ય હિલચાલ અને ઈરાનની ધમકીઓએ આગામી દિવસોમાં વૈશ્વિક તેલ પુરવઠા પર મોટો ખતરો ઉભો કર્યો છે.