પાકિસ્તાનની રાજધાની ઇસ્લામાબાદમાં આજે એક મોટો આત્મઘાતી હુમલો થયો હતો. અહેવાલો અનુસાર, બોમ્બ વિસ્ફોટમાં 69 લોકો માર્યા ગયા છે અને 169થી વધુ ઘાયલ થયા છે. ઇસ્લામાબાદમાં એક શિયા મસ્જિદમાં શુક્રવારની નમાજ દરમિયાન આ આત્મઘાતી હુમલો થયો હતો. વિસ્ફોટ પછીના અનેક ફોટા અને વીડિયો સામે આવ્યા છે, જેમાં મસ્જિદની અંદર અને બહાર બંને જગ્યાએ મૃતદેહો વેર વિખેર જોવા મળે છે.

મળતી માહિતી મુજબ, ફેડરલ રાજધાનીના શહઝાદ ટાઉનના તરલાઈ વિસ્તારમાં ખાદીજાતુલ કુબ્રા મસ્જિદ-કમ-ઇમામ્બરામાં એક ભયાનક બોમ્બ વિસ્ફોટ થયો હતો. હુમલા બાદ, ફેડરલ રાજધાનીના પોલીક્લિનિક, પાકિસ્તાન ઇન્સ્ટિટ્યૂટ ઓફ મેડિકલ સાયન્સ (PIMS) અને CDA હોસ્પિટલમાં કટોકટી જાહેર કરવામાં આવી છે.

ઇસ્લામાબાદમાં હુમલો કેવી રીતે થયો?

ઇસ્લામાબાદના શહઝાદ ટાઉન વિસ્તારમાં તરલાઈ ઇમામબારામાં એક આત્મઘાતી બોમ્બ વિસ્ફોટ થયો.

તે વ્યક્તિને ઇમામબારાના દરવાજા પર રોકવામાં આવ્યો હતો, પરંતુ તેણે તરત જ પોતાનો બોમ્બ વિસ્ફોટ કર્યો.

એક મોટો વિસ્ફોટ થયો, જેમાં ઘણા લોકો માર્યા ગયા.

બોમ્બ વિસ્ફોટથી મસ્જિદના દરવાજાના માળખાને વ્યાપક નુકસાન થયું.

વિસ્ફોટથી નજીકની ઇમારતોની બારીઓ તૂટી ગઈ. કાટમાળ રસ્તા પર વિખરાયેલો જોવા મળ્યો.

મસ્જિદમાં વિસ્ફોટના સમાચાર મળતા જ બચાવ ટીમો અને પોલીસ ઘટનાસ્થળે પહોંચી ગઈ.

ઘાયલોને સારવાર માટે હોસ્પિટલમાં લઈ જવામાં આવ્યા હતા, અને ઇસ્લામાબાદની હોસ્પિટલોમાં કટોકટી જાહેર કરવામાં આવી હતી.

નિર્દોષ નાગરિકોને નિશાન બનાવવું એ માનવતા વિરુદ્ધનો ગુનો

ઇસ્લામાબાદમાં આ હુમલો ઉઝબેકિસ્તાનના રાષ્ટ્રપતિ શવકત મિર્ઝીયોયેવની મુલાકાત દરમિયાન થયો હતો, જેઓ ગુરુવારે બે દિવસની રાજ્ય મુલાકાત માટે પાકિસ્તાન પહોંચ્યા હતા. પાકિસ્તાનના રાષ્ટ્રપતિ આસિફ અલી ઝરદારીએ વિસ્ફોટની કડક નિંદા કરતા કહ્યું કે, નિર્દોષ નાગરિકોને નિશાન બનાવવું એ માનવતા વિરુદ્ધનો ગુનો છે. પાકિસ્તાનના વડા પ્રધાન શાહબાઝ શરીફે ઊંડા દુ:ખ વ્યક્ત કર્યું અને હુમલાની સખત નિંદા કરી. હુમલા બાદ ઇમામબારામાં ભારે સુરક્ષા દળો તૈનાત કરવામાં આવ્યા છે.