જાન્યુઆરી 2025થી અત્યાર સુધીમાં રાજ્યએ કુલ 20.3 લાખ નવા ગ્રાહકો ઉમેર્યા છે. આ વધારો 2024માં થયેલા નુકસાનની ભરપાઈ કરે છે. ગયા વર્ષે ટેરિફ વધારો, યુઝર્સ દ્વારા સિમ કાર્ડ ઘટાડવા અને ટેલિકોમ કંપનીઓના નેટવર્ક ફેરફારને કારણે ગુજરાતમાં લગભગ 14.4 લાખ ગ્રાહકો ઘટ્યા હતા, જેના કારણે કુલ ગ્રાહકોની સંખ્યા 6.6 કરોડથી ઘટીને 6.5 કરોડ થઈ ગઈ હતી.

ઉદ્યોગ નિષ્ણાતો જણાવે છે કે 2025માં આ વધારો અનેક કારણોથી થયો છે. તેમાં સ્પર્ધાત્મક દરો, ગ્રામ્ય વિસ્તારોમાં નેટવર્કનો વિસ્તાર, રોજગાર માટે ગુજરાતમાં આવતાં પ્રવાસી મજૂરો, તેમજ કેટલાક મહિનાઓમાં એનઆરઆઈઓના આગમનનો સમાવેશ થાય છે.

ઉદ્યોગ સાથે જોડાયેલા એક સૂત્રે જણાવ્યું હતું કે, ગયા વર્ષે વધારાની સિમ કાર્ડ બંધ કરનારા ભાવ સંવેદનશીલ ગ્રાહકો હવે ફરી પાછા આવી રહ્યા છે, કારણ કે સસ્તા પ્લાન અને વધુ ડેટાવાળા ઓફર્સ ઉપલબ્ધ થયા છે. સાથે જ મોબાઇલ નંબર પોર્ટેબિલિટી (એમએનપી) દ્વારા વોડાફોન આઇડિયાથી અન્ય નેટવર્કમાં જતા ગ્રાહકો પણ વધારો માટે જવાબદાર છે. નેટવર્ક ગુણવત્તાની સમસ્યા અને નબળી કવરેજને કારણે ઘણા ગ્રાહકો અન્ય કંપનીઓ તરફ વળ્યા હોવાનું પણ જણાવાયું છે.

ટેલિકોમ કંપનીઓએ નેટવર્ક વિસ્તાર અને ક્ષમતા વધારવા પર ખાસ ધ્યાન આપ્યું છે. નવી નીતિઓને કારણે ટાવર ઝડપથી કાર્યરત થતાં ઇન્ડોર કવરેજ અને ડેટા સ્પીડમાં ખાસ કરીને મોટા શહેરોના રહેણાંક અને વિકસતા વિસ્તારોમાં સુધારો થયો છે.

ગ્રામ્ય ગુજરાત પણ હવે મહત્વપૂર્ણ યોગદાન આપી રહ્યું છે. ગ્રામ્ય અને અર્ધશહેરી વિસ્તારોમાં કરાયેલા રોકાણોથી નેટવર્કની ખામીઓ ઘટી છે. સાથે જ સસ્તા સ્માર્ટફોન, સ્થાનિક ભાષામાં ડિજિટલ સેવાઓ અને UPI પેમેન્ટ, ઇ-ગવર્નન્સ, વીડિયો સ્ટ્રીમિંગ અને સોશિયલ મીડિયાના વધતા ઉપયોગથી નવા યુઝર્સ મોબાઇલ બ્રોડબેન્ડ તરફ જોડાઈ રહ્યા છે.

નિષ્ણાતોના જણાવ્યા અનુસાર, ગુજરાતમાં મજૂરો ઉપરાંત અધિકારીઓનું સતત સ્થળાંતર અને તહેવાર તથા શિયાળાના સમયમાં એનઆરઆઈનું આગમન પણ પ્રીપેઇડ અને ટૂંકા ગાળાના મોબાઇલ કનેક્શન વધારવામાં મદદરૂપ બન્યું છે.