ફીજીમાં ૮૬ વર્ષીય ઉબેર ડ્રાઈવરની કહાની સોશિયલ મીડિયા પર ધૂમ મચાવી રહી છે. ઉદ્યોગસાહસિક નવ શાહે ઇન્સ્ટાગ્રામ પર એક વિડિઓ શેર કર્યો છે જેમાં વૃદ્ધ ડ્રાઈવર સાથેની તેમની મુલાકાતનું વર્ણન કરવામાં આવ્યું છે. શાહે કહ્યું કે તેમને એ જાણીને આશ્ચર્ય થયું કે આ માણસ માત્ર એક ડ્રાઈવર નહોતો, પરંતુ ૧૭૫ મિલિયન ડોલરના વાર્ષિક ટર્નઓવર સાથેના વિશાળ વ્યવસાય સામ્રાજ્યનો માલિક હતો.

જ્યારે શાહે પૂછ્યું કે તે પોતાની સંપત્તિ હોવા છતાં ઉબેર કેમ ચલાવે છે, ત્યારે તેમણે હસીને જવાબ આપ્યો, હું ભારતમાં છોકરીઓના શિક્ષણને ટેકો આપવા માટે આ પૈસા મોકલું છું. હું જે પણ રાઈડ લઉં છું તે બીજી છોકરીને શાળાએ જવા માટે મદદ કરે છે. આ પ્રેરણાદાયી કાર્ય લાખોને સ્પર્શે છે અને બતાવે છે કે ઉંમર કે સફળતા ક્યારેય કોઈના સમાજ સેવા પ્રત્યેના જુસ્સાને રોકી શકતી નથી.

પોસ્ટના કેપ્શનમાં, નવ શાહે લખ્યું કે તે ૮૬ વર્ષના છે, ઉબેર ચલાવે છે અને તેનો ૧૭૦ મિલિયન ડોલરથી વધુનો બીઝનેસ છે. તેણે પોતાના જીવનમાં ઘણું બધું પ્રાપ્ત કર્યું છે - પૈસા, સફળતા અને ખ્યાતિ - પરંતુ તે ખૂબ જ દયાળુ વ્યક્તિ રહે છે. શાહે લખ્યું, તેમણે મને શીખવ્યું કે સાચી સફળતા તમે કેટલા ઊંચાઈ પર પહોંચો છો તેના પરથી માપવામાં આવતી નથી, પરંતુ તમે તમારી સાથે કેટલા લોકોને ઉંચા કરો છો તેના પરથી માપવામાં આવે છે. વાતચીત દરમિયાન, ડ્રાઇવરે ખુલાસો કર્યો કે છેલ્લા 10 વર્ષથી, તે દર વર્ષે 24 છોકરીઓના શિક્ષણ માટે વ્યક્તિગત રીતે ભંડોળ પૂરું પાડે છે. તે તેની ઉબેર કમાણીમાંથી તેમના શિક્ષણનો ખર્ચ ઉઠાવે છે.

વધુમાં, તેણે શેર કર્યું કે તેની પોતાની ત્રણ પુત્રીઓ છે, જે બધી ઉચ્ચ શિક્ષિત અને સફળ છે. તેણે કહ્યું, મેં તેમને સારું શિક્ષણ આપ્યું. તેઓએ સારું પ્રદર્શન કર્યું. તેઓ ખૂબ જ ઉચ્ચ હોદ્દા પર છે. તેથી, મેં વિચાર્યું કે હું અન્ય છોકરીઓને તેમના સપના પૂરા કરવામાં મદદ કરી શકું છું. તેણે તેના પરિવારની નોંધપાત્ર વ્યવસાયિક સફરનો પણ ઉલ્લેખ કર્યો. તેણે કહ્યું, અમારી પાસે 13 જ્વેલરી સ્ટોર અને છ રેસ્ટોરન્ટ છે. અમારી પાસે ચાર સુપરમાર્કેટ અને અન્ય ઘણા વ્યવસાયો પણ છે.

પોતાના મૂળ વિશે વાત કરતા, વૃદ્ધ ડ્રાઇવરે કહ્યું કે તેના પિતાએ 1929 માં ભારતમાં ફક્ત પાંચ પાઉન્ડથી પોતાનો વ્યવસાય શરૂ કર્યો હતો. તેણે એક કંપનીમાં વાર્ષિક 15 પાઉન્ડ માટે કામ કર્યું, પાંચ પાઉન્ડ બચાવ્યા, અને પછી પોતાનો વ્યવસાય શરૂ કર્યો. સોશિયલ મીડિયા પર લોકોએ ઉબેર ડ્રાઇવરની સાદગી અને સારા ઇરાદાઓની પ્રશંસા કરી