જસદણના નાની લાખાવડ ગામમાં રહેતાં ચિરાગભાઈ ધારશીભાઇ સાપરા (ઉ.વ.૨૯) એ નોંધાવેલી ફરીયાદમાં આરોપી તરીકે ભાડલા ગામના ભોળા વસુભાઇ સભાડનું નામ આપ્યું છે. ફરિયાદમાં જણાવ્યું હતું કે, તેઓને ભાડલા ગામે, કમળાપુર રોડ પર સહકારી મંડળી સામે નિલકંઠ એગ્રો સેન્ટર નામની દુકાન આવેલી છે. આ એગ્રોની દુકાન તેઓને જેન્તીભાઈ સીદાભાઇ ધોડકીયા સાથે ભાગીદારીથી આવેલી છે.

ગઇ તા.૧૩ ના તેઓ સાડા છએક વાગ્યે દુકાને હતાં અને ત્યારબાદ ઘરે જતો રહેલ હતો, જે બાદ ભાગીદાર જેન્તીભાઈ ધોડકીયા દુકાને હતા. તેઓ રાત્રીના સાડા સાતેક વાગ્યે દુકાન બંધ કરી જતા રહેલ હતા. ગઈકાલે સવારના આઠેક વાગ્યે દુકાને આવ્યા હતા ત્યારે દુકાનના રૂપિયા રાખવાનો ગલ્લો (ખાનું) તુટેલ હાલતમાં હોય જેથી તેમાં તપાસ કરતા કોઇ રોકડા રૂપિયા જોવામાં આવેલ નહીં. જેથી ભાગીદાર જેન્તીભાઈ ધોડકીયાને ચોરી થયા અંગેની જાણ કરેલ અને તેઓએ કહેલ કે, ગલ્લામાં આશરે રૂ.૮ હજાર હતાં.

ત્યારબાદ દુકાનમાં સીસીટીવી ફૂટેજ ચેક કરતા તેમા રાત્રીના એક વાગ્યે દુકાનની અંદર ભોળાભાઈ સભાડ અંદર પ્રવેશ કરે છે અને દુકાનના કાઉન્ટર ટેબલમાં તથા દુકાનની અંદર રૂપિયાની શોધખોળ કરી ટેબલના ઉપલા ખાનાને (ગલ્લો) ખેંચીને તોડી ગલ્લામાં રહેલ વેપારના રોકડા રૂપિયા તેના કોટના ખિસ્સામાં નાખે છે તેવું સીસીટીવી ફુટેજમાં દેખાયુ હતું. આ તસ્કર ભોળાભાઈ સભાડ દુકાને છેલ્લા છએક મહિનાથી ગ્રાહક હોય અને દોઢેક મહિના પહેલા તેને બાકીમાં ધંધો કરવાની ના પાડી હતી.

બનાવ અંગેની ફરીયાદ પરથી ભાડલા પોલીસે ગુનો નોંધી સીસીટીવી ફૂટેજના આધારે તસ્કરને ઝડપી લેવા તપાસ હાથ ધરી છે.