યુએસ પ્રમુખ વારંવાર વેઓ દાવો કરે છે કે પોતે વિશ્વમાં ચાલી રહેલા યુદ્ધોને સમાપ્ત કરવામાં મહત્વની ભૂમિકા ભજવી છે ત્યારે તેમના પોતાના દેશમાં અસંતોષ નો ઉકળી રહેલો ચરુ તેમને નહી દેખાતો હોય તેવો સીનારીઓ ઘડાયો છે. યુએસ પ્રમુખ ડોનાલ્ડ ટ્રમ્પ હવે યુક્રેન યુદ્ધ પર ધ્યાન કેન્દ્રિત કરી રહ્યા છે ત્યારે આજે શનિવારે, ટ્રમ્પની નીતિઓનો વિરોધ કરવા માટે હજારો લોકો તેમના જ દેશના અનેક વિસ્તારોમાં રસ્તાઓ પર ઉતરશે. આ પ્રદર્શનોનો હેતુ રાષ્ટ્રપતિ ડોનાલ્ડ ટ્રમ્પના પગલાં સામે અવાજ ઉઠાવવાનો છે, જેને ઘણા લોકો દેશમાં વધતી જતી સરમુખત્યારશાહી વૃત્તિઓ તરીકે જુએ છે. આ પ્રદર્શનનો કિંગ્સ નામથી આયોજિત બીજો મોટો વિરોધ છે અને આ વર્ષે ટ્રમ્પ વહીવટ સામે ત્રીજો રાષ્ટ્રવ્યાપી આંદોલન છે.

કિંગ્સ નામે ટ્રમ્પ વહીવટ સામે ત્રીજુ રાષ્ટ્રવ્યાપી આંદોલન છેડાશે

આયોજકોએ અહેવાલ આપ્યો છે કે અમેરિકાના તમામ ૫૦ રાજ્યોમાં ૨,૫૦૦ થી વધુ વિરોધ પ્રદર્શનો યોજાશે. સૌથી મોટી રેલી વોશિંગ્ટન, ડી.સી.માં યોજાશે. આ વિરોધ પ્રદર્શનો એવા સમયે થઈ રહ્યા છે જ્યારે દેશના ઘણા ભાગોમાં ફેડરલ સત્તાવાળાઓ અને વિરોધીઓ વચ્ચે અથડામણો વધી રહી છે. એપી અનુસાર, કેટલાક રૂઢિચુસ્ત નેતાઓએ આ પ્રદર્શનોની ટીકા કરી છે, તેમને "હેટ અમેરિકા રેલીઓ" ગણાવી છે, જ્યારે અન્ય લોકો તેને અભિવ્યક્તિની સ્વતંત્રતા અને લોકશાહીના બચાવ તરીકે જુએ છે.આ વિરોધ પ્રદર્શનો દેશના લગભગ દરેક ખૂણામાં યોજાશે, ન્યૂ યોર્ક જેવા મોટા શહેરોથી લઈને મોન્ટાનાના પૂર્વ ગ્લેશિયર રિજ જેવા વિસ્તારો સુધી વિસ્તરશે

શા માટે વિરોધ પ્રદર્શનો થઈ રહ્યા છે

અહેવાલ મુજબ, વિરોધ આંદોલનને ટેકો આપતા લગભગ 300 સંગઠનોના ગઠબંધનનો ભાગ, મૂવઓન સંગઠનના મુખ્ય સંદેશાવ્યવહાર અધિકારી જોએલ પેને જણાવ્યું હતું કે, "અમેરિકન જનતા એવી સ્થિતિમાં પહોંચી ગઈ છે જ્યાં તેમને લાગે છે કે ડોનાલ્ડ ટ્રમ્પ હવે આ દેશના મૂળભૂત લોકશાહી ધોરણોનું સન્માન કરતા નથી. પછી ભલે તે શક્તિનું સંતુલન હોય, લઘુમતી અધિકારોનું રક્ષણ હોય, અથવા આપણે બધા જેના પર આધાર રાખીએ છીએ તે મૂળભૂત અધિકારો હોય, જેમ કે અભિવ્યક્તિની સ્વતંત્રતા હોય.જોએલ પેને વધુમાં જણાવ્યું હતું કે, "આપણે સ્પષ્ટ સંદેશ મોકલવો જરૂરી છે કે અમેરિકામાં કોઈ રાજા નથી - હમણાં નહીં, ક્યારેય નહીં." પેનના મતે, આ વિરોધ એ વાત પર ભાર મૂકે છે કે અમેરિકા એક લોકશાહી પ્રજાસત્તાક છે, જ્યાં સત્તા બંધારણ, કાયદા અને લોકોની ઇચ્છામાં રહે છે - કોઈ વ્યક્તિની વ્યક્તિગત ઇચ્છામાં નહીં. 'નો કિંગ્સ' ના નારા દ્વારા, વિરોધીઓ એવું કહેવા માંગે છે કે તેઓ કોઈપણ પ્રકારની સરમુખત્યારશાહીનો વિરોધ કરશે.

ટ્રમ્પની કઈ નીતિઓ સામે લોકોને વાંધો?

બીનનફાકારક સંસ્થા ઇન્ડિવિઝિબલના સહ-કાર્યકારી નિર્દેશક લેવિને રાષ્ટ્રપતિ ટ્રમ્પની નીતિઓની આકરી ટીકા કરી. તેમણે જણાવ્યું હતું કે ટ્રમ્પે ઇમિગ્રેશનને વધુ પડતું કડક બનાવ્યું છે, પ્રેસ સ્વતંત્રતા પર નિયંત્રણો લાદ્યા છે અને તેમના રાજકીય વિરોધીઓ સામે બદલો લેવાની કાર્યવાહી કરી છે.લેવિનના મતે, આ બધી ક્રિયાઓ યુએસ બંધારણ દ્વારા ખાતરી આપવામાં આવેલા અધિકારો માટે સીધો ખતરો છે. તેમણે કહ્યું હતું કે આ ફક્ત નીતિગત વિવાદ નથી, પરંતુ લોકશાહીના મૂળભૂત સિદ્ધાંતો - જેમ કે પ્રેસની સ્વતંત્રતા, ન્યાયી ચૂંટણીઓ અને અસંમતિનો અધિકાર - ને નબળી પાડવાનો પ્રયાસ છે. તેમનો દલીલ છે કે જો આ પગલાંનો વિરોધ ન કરવામાં આવે તો, દેશની લોકશાહી વ્યવસ્થાને નોંધપાત્ર નુકસાન થઈ શકે છે.છેલ્લો "નો કિંગ્સ" વિરોધ 14 જૂને થયો હતો, જ્યારે હજારો લોકો અમેરિકાના શહેરો અને નગરોમાં રસ્તાઓ પર ઉતર્યા હતા.