પ્રાપ્ત વિગતો મુજબ, રાજકોટ ભૂસ્તરશાસ્ત્રી ટીમ દ્વારા જિલ્લામાં ગેરકાયદેસર ખનન તથા ખનીજ વહન સામે તપાસ અને ચેકિંગની કામગીરી હાથ ધરવામાં આવી રહી છે. તેના ભાગરૂપે જસદણ તાલુકાના કાનપર ગામ ખાતે તપાસ દરમિયાન રેતીની ગેરકાયદેસર ચોરી અને વહન કરતા ત્રણ ડમ્પર તથા એક લોડર મળી આવ્યા હતા. નિયમભંગ બદલ આ વાહનોને ઝડપી લઈ જરૂરી કાર્યવાહી હાથ ધરવામાં આવી હતી. પકડાયેલા મુદ્દામાલની અંદાજિત કિંમત રૂ.૫૦ લાખ જેટલી હોવાનું સામે આવ્યું છે. તેમજ આ મામલે કુલ રૂપિયા ૪.૪૨ લાખનો દંડ વસૂલી તમામ રકમ સરકારી તિજોરીમાં જમા કરાઈ છે. આ ઉપરાંત છેલ્લા એક સપ્તાહ દરમિયાન પણ ખનીજ વહન કરતા ઓવરલોડ વાહનો સામે કાર્યવાહી કરવામાં આવી છે. વિંછીયા, કુવાડવા હાઇવે અને આટકોટ નજીક હાથ ધરાયેલી તપાસમાં કુલ ચાર ઓવરલોડ વાહનો જપ્ત કરવામાં આવ્યા હતા. આ વાહનો સામેની કાર્યવાહી દરમિયાન રૂ.૨.૯૧ લાખનો દંડ વસૂલવામાં આવ્યો હોવાનું જાણવા મળે છે. રાજકોટ જિલ્લામાં ગેરકાયદેસર ખનન, રેતીચોરી તેમજ નિયમવિરુદ્ધ ખનીજ વહન અટકાવવા માટે ભૂસ્તરશાસ્ત્રી ટીમ દ્વારા સતત પેટ્રોલિંગ અને ચેકિંગ કરવામાં આવી રહ્યું છે. ખાસ કરીને હાઇવે અને ખનીજ વહનના સંવેદનશીલ માર્ગો પર વાહનોની તપાસ વધારવામાં આવી છે. આગામી દિવસોમાં પણ ગેરકાયદેસર ખનન અને ઓવરલોડ ખનીજ વહન સામે કાર્યવાહી વધુ તેજ કરવામાં આવે તેવી શક્યતા છે.