રાજકોટ મહાપાલિકાની ટાઉન પ્લાનિંગ બ્રાન્ચ ફરી હરકતમાં આવી છે અને ગેરકાયદે બાંધકામો કરનારા ઉપર સકંજો કસ્યો છે. દરમિયાન આજે સેન્ટ્રલ ઝોન હેઠળના સોની બજાર, એરપોર્ટ રોડ અને જંકશન પ્લોટ સહિતના વિસ્તારોમાં ગેરકાયદેસર બાંધકામ બદલ ત્રણ મિલકતો સીલ કરતા ગેરકાયદે બાંધકામો કરનારાઓમાં ફફડાટ ફેલાઇ ગયો છે. દરમિયાન આજે બપોરે બાદ પણ સિલિંગ ડ્રાઇવ યથાવત રહેનાર હોય હજુ વધુ મિલકતો સીલ થવાની શક્યતા હોવાનું જાણવા મળે છે.

વિશેષમાં મ્યુનિ.સુત્રોમાંથી પ્રાપ્ત વિગતો મુજબ, સેન્ટ્રલ ઝોન હેઠળના વોર્ડ નં.૭માં સોની બજાર વિસ્તારમાં ગુજરી બજાર ચોક નજીક સુશાંતભાઇનું ગેરકાયદે બાંધકામ, વોર્ડ નં.૨માં એરપોર્ટ રોડ નજીક આવેલા એકજાન નગરમાં મુર્તુજાભાઇ માંકડાનું બાંધકામ તેમજ વોર્ડ નં.૩માં જંકશન પ્લોટ વિસ્તારના અમરનાથ એપાર્ટમેન્ટમાં પરેશભાઇ ડોડીયાનું બાંધકામ સહિતની ત્રણ મિલકતો અંગે અવારનવાર મળેલી ગેરકાયદેસર બાંધકામની ફરિયાદને પગલે સિટી ઇજનેરના આદેશથી ટાઉન પ્લાનિંગ બ્રાન્ચ દ્વારા સીલ કરવામાં આવી હતી.

અત્રે ઉલ્લેખનીય છે કે અગાઉ જે ગેરકાયદે બાંધકામને ૨૬૦(૧) અને (૨) હેઠળની નોટિસો અપાઇ હોય તેવી મિલકતો તેમજ કોઇ પણ સ્થળે નવું ગેરકાયદે બાંધકામ થઇ રહ્યાનું ધ્યાને આવે કે ફરિયાદ મળે તો તેવી મિલકતો તાત્કાલિક અસરથી સીલ કરવામાં આવી રહી છે.