એક્ટર ટાઇગર શ્રોફને લઈને એક મોટા સમાચાર સામે આવી રહ્યા છે. રવિવાર સાંજે મુંબઈના જુહુ વિસ્તારમાં ટાઇગર શ્રોફ પર ફાયરિંગ કરવામાં આવ્યું છે. પોલીસ સૂત્રોના જણાવ્યા અનુસાર આ હુમલામાં ટાઇગર શ્રોફ સંપૂર્ણપણે સુરક્ષિત છે, જ્યારે તેમના ડ્રાઇવરને સારવાર માટે નાણાવટી હોસ્પિટલમાં દાખલ કરવામાં આવ્યા છે.

માહિતી મુજબ ટાઇગર શ્રોફ ફૂટબોલ મેચ રમીને પોતાના ઘરે પરત ફરી રહ્યા હતા, તે દરમિયાન તેમની BMW કાર પર ત્રણ રાઉન્ડ ફાયરિંગ કરવામાં આવ્યું હતું. ગોળીબારીનું ચોક્કસ કારણ હજુ સુધી સ્પષ્ટ થયું નથી. ઘટના બાદ પોલીસે સમગ્ર વિસ્તારની ઘેરબંધી કરીને આરોપીઓની શોધખોળ શરૂ કરી દીધી છે.

સોશિયલ મીડિયા પર લોરેન્સ બિશ્નોઈ ગેંગે આ હુમલાની જવાબદારી લીધી છે. વિદેશમાં બેઠેલા ગેંગસ્ટર અનિલ પંડિત અને હરમાન સંધુના નામથી આ ફાયરિંગની જવાબદારી સ્વીકારવામાં આવી છે, જેઓ લોરેન્સ ગેંગના સભ્યો છે. જોકે, આ સોશિયલ મીડિયા પોસ્ટની પ્રમાણીક અને તેમાં કરવામાં આવેલા દાવાઓની સત્તાવાર પુષ્ટિ થવાની હજુ બાકી છે.

ઘટનાની ગંભીરતાને જોતા મહારાષ્ટ્રના મંત્રી આશિષ શેલારે પણ ટાઇગર શ્રોફના પરિવાર સાથે ફોન પર વાત કરીને તેમનું કુશળક્ષેમ પૂછ્યું હતું. ઝોન-1 (પશ્ચિમી ક્ષેત્ર) ના ડીસીપી મોહિત ગર્ગે સ્પષ્ટ કર્યું છે કે ટાઇગર શ્રોફ સુરક્ષિત છે અને આ ફાયરિંગમાં તેમને કોઈ ઈજા થઈ નથી. પોલીસે આ મામલામાં આગળની તપાસ સઘન બનાવી છે.