શહેરમાં ટ્રાફીક સમસ્યાની કપરી સ્થિતિમાં અન્ય બે માર્ગમાં પણ ગેપથી ટ્રાફીકની અંધાધૂધીથી વાહનચાલકો ભારે હાડમારીનો સામનો કરી રહ્યા છે. જેમાંનો એક માર્ગ છે. ગુલાબનગરથી સુભાષબ્રીજ સુધીનો માર્ગ. કે જેમાં ગુલાબનગર ઢાળિયા પછી  શહેરના પ્રવેશદ્રારના બોર્ડ સુધીના માર્ગમાં બે ગેપ મૂકવામાં આવ્યા છે. આ માર્ગ પર બંને બાજુ પાનની દુકાનો, ચાની હોટલો અને અન્ય ઓફીસો તથા પેટ્રોલપ પંપ  આવેલો હોય વાહનચાલકો ગમે તે સમયે ટર્ન લે છે. આટલું જ નહીં રાજકોટ જવા માટેનો આ મુખ્ય માર્ગ હોય એસટી તેમજ ખાનગી બસ તેમજ મનપાની સીટી બસ પણ દોડે છે. ત્યારે આ બે ગેપના કારણે રોજ પારવાર ટ્રાફીક સમસ્યા સર્જાઇ છે. જયારે અન્ય માર્ગ છે, સાત રસ્તા સર્કલથી જનતાફાટક થઇ ગોકુલનગર સુધીનો માર્ગ. આ માર્ગ પર અટલ ભવન એટલે કે જિલ્લા ભાજપ કાર્યાલય, ફાયર સ્ટેશન સહીત દુકાનો અને ઓફીસ, આધોગીક એકમો તથા રહેણાંક મકાનો આવેલા છે.


આમ છતાં આ માર્ગ પર અણધડ અને મનસ્વી રીતે ગેપ એટલે કે ક્રોસીંગ મૂકવામાં આવ્યા છે. જેના કારણે ટ્રાફીક સમસ્યા બેકાબૂ બની છે. ત્યારે આ માર્ગ પણ ટ્રાફીકની અંધાધૂધીથી આ માર્ગ અકસ્માત ઝોન બની રહ્યાની ફરિયાદો લોકોમાં ઉઠી છે. ત્યારે મહત્વના માર્ગમાં બીનજરૂરી ગેપ બુરવાને બદલે મહાનગરપાલીકા તમાશો જોઇ રહી હોય તેમ મૌન સેવતા શહેરીજનોમાં ભારે રોષની લાગણી ફેલાઇ છે.

​​​​​​​

જનતાફાટક અને સમર્પણ સર્કલ પર દરરોજ છાશવારે ટ્રાફીકજામ 

જામનગરમાં સાત રસ્તા સર્કલથી ગોકુલનગર તરફના માર્ગ પર જનતાફાટક સર્કલ કે જયાં ચાર માર્ગ ભેગા થાય છે. આ સર્કલમાં કોઇપણ પ્રકારનું ટ્રાફીક નિયમન  કરવામાં આવતું નથી. આટલું જ નહીં સર્કલ હોવા છતાં થોડા અંતરે પુન: ગેપ મૂકવામાં આવ્યા છે. જે ખરેખર નવાઇની વાત છે. આ જ રીતે સમર્પણ સર્કલ કે જયાંથી જુદા-જુદા પાંચ માર્ગ તરફ જઇ શકાય છે. આ સર્કલ પણ પણ ટ્રાફીક સુચારૂ ટ્રાફીક નિયમનના અભાવે ચકકાજામના વરવા દ્રશ્યો જોવા મળી રહ્યા છે.


બંને માર્ગ પર રખડતા ઢોરના અડીંગાથી બેવડાતી મુશ્કેલી, જીવલેણ દુઘર્ટનાની ભીતિ

જામનગરમાં સાત રસ્તા સર્કલથી જનતાફાટક થઇ ગોકુલનગર તરફના માર્ગ પર અને ગુલાબનગર માર્ગ પર શહેરના પ્રવેશદ્રાર સુધી ગેપના કારણે ટ્રાફીકજામથી શહેરીજનો રીતસર ત્રાસી ગયા છે. ત્યારે આ ગંભીર સમસ્યા વચ્ચે બંને માર્ગ પર રખડતા ઢોરના અડીંગાથી વાહનચાલકોની મુશ્કેલી બેવડાઇ રહી છે. ટ્રાફીકજામ વચ્ચે રખડતા ઢોરના અડીંગાથી જીવલેણ દુઘર્ટનાની ભીતિ પણ છે. ત્યારે કોઇ ગોઝારો અકસ્માત થશે તો જવાબદાર કોણ તે સવાલ શહેરીજનોમાં ઉઠયો છે.