ભાવનગર એલસીબી ટીમે વિદેશી દારૂમાં જથ્થા સાથે બે શખ્સોને ઝડપી લીધા હતા. શહેરના પ્રવેશદ્વાર નારી ચોકડી ફ્લાય ઓવર પાસે બેગમાં વિદેશી દારૂના ૮૮ ચપટાં લઈને ઉભેલા મહુવાના બે શખ્સને લોકલ ક્રાઈમ બ્રાંચે ઝડપી વરતેજ પોલીસને સોંપી દીધા હતા. દારૂની બોટલો સાથે બન્ને શખ્સને વરતેજ પોલીસને સોંપી દેવાયા હતા.

આ અંગે લોકલ ક્રાઇમ બ્રાન્ચ કચેરી ખાતેથી મળતી માહિતી અનુસાર એલસીબીની ટીમ પેટ્રોલીંગમાં હતી. ત્યારે નારી ચોકડી ફૂલાય ઓવર પાસે ભાવનગર શહેર તરફ જવાના રસ્તા પર એક દિવ્યાંગ સહિત બે શખ્સ બેગમાં દારૂનો જથ્થો લઈને ઉભા હોવાની ચોક્કસ બાતમીના આધારે ક્રાઈમ બ્રાંચની ટીમે દોડી જઈ રાજુભાઈ લખમણભાઈ જોળિયા (રહે,પ્લોટ નં.૩૩૫, નૂતનનગર, મહુવા) અને ગોપાલભાઈ બુધાભાઈ મકવાણા (રહે,સરકારી હોસ્પિટલવાળા ખાંચામાં, કુબેરબાગ, નૂતનનગર, મહુવા) નામના બે શખ્સને દારૂના ૮૮ ચપટાં અને બેગ સહિતના મુદ્દામાલ સાથે ઝડપી લઈ બંને વિરૂધ્ધ પ્રોહિબીશન એક્ટની જુદી-જુદી કલમ હેઠળ ગુનો દાખલ કરી વરતેજ પોલીસ મથક ખાતે સોંપી આપી ધોરણસરની કાર્યવાહી હાથ ધરી હતી.