ભારતીય વાયુસેનાનું સુખોઈ એસયુ-30 એમકેઆઇ ફાઇટર જેટ ગઈકાલે જોરહાટથી 60 કિલોમીટર દૂર આસામના કાર્બી આંગલોંગ વિસ્તારમાં તાલીમ મિશન દરમિયાન ક્રેશ થયું હતું. વાયુસેનાએ ગઈકાલે મોડી રાત્રે આ વાતની પુષ્ટિ કરી હતી. અગાઉ વિમાન ગુમ થયાની જાણ કરવામાં આવી હતી. અધિકારીઓએ જણાવ્યું હતું કે આસામના જોરહાટથી ઉડાન ભર્યા પછી વિમાનનો રડાર સંપર્ક તૂટી ગયો હતો, જેના કારણે શોધ કામગીરી શરૂ કરવામાં આવી હતી. ભારતીય વાયુસેનાએ હવે તેના પાઇલટ શહીદ થતા શોક વ્યક્ત કર્યો છે.

ભારતીય વાયુસેનાએ શોક વ્યક્ત કરતાં કહ્યું, એસયુ-30 વિમાન દુર્ઘટનામાં ગંભીર રીતે ઘાયલ થયેલા સ્ક્વોડ્રન લીડર અનુજ અને ફ્લાઇટ લેફ્ટનન્ટ પૂર્વેશ દુરાગકરના નિધન પર આઇએએફ ખૂબ જ શોક વ્યક્ત કરે છે. ભારતીય વાયુસેનાના તમામ કર્મચારીઓ શોકગ્રસ્ત પરિવારો પ્રત્યે હૃદયપૂર્વક સંવેદના વ્યક્ત કરે છે અને આ દુઃખની ઘડીમાં તેમની સાથે મજબૂત રીતે ઉભા છે.

એસયુ-30એમકેઆઇ એ રશિયન વિમાન ઉત્પાદક સુખોઈ દ્વારા વિકસિત બે સીટવાળું, લાંબા અંતરનું ફાઇટર એરક્રાફ્ટ છે. તે હવે હિન્દુસ્તાન એરોનોટિક્સ લિમિટેડ (એચએએલ) દ્વારા ભારતીય વાયુસેનાના લાઇસન્સ હેઠળ બનાવવામાં આવે છે. ભારતીય વાયુસેના પાસે 260થી વધુ એસયુ-30 એમકેઆઇ વિમાનોનો કાફલો છે, જેણે અનેક યુદ્ધોમાં પોતાની ક્ષમતા સાબિત કરી છે.

2000ના દાયકાની શરૂઆતમાં વાયુસેનામાં સામેલ કરાયેલ સુખોઈ એસયુ-30એમકેઆઇ, સૌથી શક્તિશાળી ફાઇટર એરક્રાફ્ટમાંનું એક માનવામાં આવે છે. આ પહેલી વાર નથી જ્યારે સુખોઈ વિમાન ક્રેશ થયું હોય. સુખોઈ-30એમકેઆઇ વિમાન આ પહેલા પણ ક્રેશ થયું હતું. ઓગસ્ટ 2019માં, એક સુખોઈ-30એમકેઆઇ નિયમિત તાલીમ મિશન દરમિયાન આસામના તેઝપુર નજીક ડાંગરના ખેતરમાં ક્રેશ થયું હતું. બંને પાઇલટ સુરક્ષિત રીતે બહાર નીકળી ગયા હતા અને બાદમાં તેમને બચાવી લેવામાં આવ્યા હતા.

મે 2015ની શરૂઆતમાં, તેઝપુર એરફોર્સ બેઝથી લગભગ 36 કિમી દક્ષિણમાં, ટેકઓફ પછી તુરંત જ બીજું સુખોઈ-30એમકેઆઇ વિમાન ક્રેશ થયું હતું, જેમાં બંને પાઇલટ સુરક્ષિત રીતે બહાર નીકળી ગયા હતા.