અમેરિકાએ હોર્મુઝની સામુદ્રધુની (સ્ટ્રેટ ઓફ હોર્મુઝ) માંથી પસાર થતાં કોમર્શિયલ તેલ ટેન્કરોને આપવામાં આવતી સૈન્ય સુરક્ષા, ખાસ કરીને હવાઈ સુરક્ષાના સમયગાળામાં મોટા કાપનો નિર્ણય લીધો છે. આ અત્યંત મહત્વપૂર્ણ દરિયાઈ વેપાર માર્ગ પરથી પસાર થતાં જહાજો પર ઈરાન દ્વારા કરવામાં આવી રહેલા હુમલાઓમાં સતત વધારો થતાં યુએસ મિલિટરી દ્વારા આ આકરો નિર્ણય લેવામાં આવ્યો છે. ફાઇનાન્શિયલ ટાઇમ્સના એક અહેવાલ મુજબ, હોર્મુઝમાં વધતા જતા જોખમો વચ્ચે ટેન્કરોની સુરક્ષા સુનિશ્ચિત કરવા માટે આ ફેરફાર કરાયો છે.

ઉલ્લેખનીય છે કે, મે મહિનાથી જ અમેરિકી સૈન્ય આ સામુદ્રધુનીના દક્ષિણ ભાગમાં ઓમાનના દરિયાકાંઠા નજીકના માર્ગ પરથી પસાર થતાં વેપારી જહાજોને હવાઈ રક્ષણ પૂરું પાડી રહ્યું હતું. આ સુરક્ષા કવચના કારણે જ ઈરાની હુમલાઓ અને ભારે તણાવ છતાં ઓઈલની શિપમેન્ટનું પરિવહન અમુક અંશે શક્ય બની રહ્યું હતું. આ પ્રક્રિયા હેઠળ જહાજના માલિકો સૌપ્રથમ યુએસ નેવીના કોઓર્ડિનેશન સેન્ટર પાસેથી મંજૂરી મેળવતા હતા, જે બાદ સેન્ટર તેમને ચોક્કસ કોઓર્ડિનેટ્સ અને પસાર થવાનો સમય ફાળવતું હતું.

પરંતુ નવીનતમ વિગતો અનુસાર, નેવલ સહયોગ અને માર્ગદર્શન પ્રણાલી (NCAGS) દ્વારા દરિયાઈ સલાહકારોને મોકલવામાં આવેલા ઈમેલ પરથી જાણવા મળ્યું છે કે સપ્ટેમ્બરના પ્રારંભમાં રાત્રિ દરમિયાન આપવામાં આવતી લાંબી સુરક્ષા અવધિને ઘટાડી દેવામાં આવી છે. હવે તેની જગ્યાએ દરરોજ માત્ર 2 ચોક્કસ 'ટ્રાન્ઝિટ સ્લોટ' જ નિર્ધારિત કરવામાં આવ્યા છે.

​​​​​​​સુરક્ષા એજન્સીઓ દ્વારા શિપિંગ કંપનીઓ અને જહાજોને ખાસ સલાહ આપવામાં આવી છે કે તેઓ અમેરિકી સેના દ્વારા નક્કી કરાયેલા આ ચોક્કસ સમયે જ પોતાની યાત્રા શરૂ કરે, જેથી તેમને શ્રેષ્ઠ સૈન્ય અને હવાઈ સુરક્ષા પ્રાપ્ત થઈ શકે. હોર્મુઝના આ વ્યૂહાત્મક માર્ગ પર સુરક્ષાના કલાકો ઘટી જવાથી વૈશ્વિક તેલ પુરવઠા અને શિપિંગ ક્ષેત્રે નવી અનિશ્ચિતતાઓ ઊભી થઈ છે.