અમેરિકાના વિદેશ મંત્રી માર્કો રૂબિયો હાલ ભારતની સત્તાવાર મુલાકાતે છે. આ મુલાકાત દરમિયાન તેઓ પશ્ચિમ ભારતના એક મહત્વપૂર્ણ અને ઐતિહાસિક તટીય શહેર એવા ગુજરાતના જામનગરની મુલાકાત લઈ રહ્યા છે. જામનગરમાં વિશ્વનું સૌથી મોટું ઓઈલ રિફાઈનિંગ આવેલ છે, જ્યાં તેઓ અબજોપતિ ઉદ્યોગપતિ મુકેશ અંબાણીની પ્રમુખ કંપની રિલાયન્સ ઇન્ડસ્ટ્રીઝ સાથે ઊર્જા સહયોગ અને વેનેઝુએલાના કાચા તેલ (ક્રુડ ઓઈલ) ની પ્રોસેસિંગ અંગે વિશેષ ચર્ચાઓ કરવાના છે.

અમેરિકી વિદેશ મંત્રીની આ મુલાકાત એવા સમયે થઈ રહી છે જ્યારે અમેરિકા વૈશ્વિક સ્તરે વેનેઝુએલાના ક્રુડ ઓઈલ માટે નવા બજારોની તલાશ કરી રહ્યું છે. અગાઉ મંગળવારે મુંબઈમાં પત્રકારો સાથે વાતચીત કરતા માર્કો રૂબિયોએ ભારતને “રિફાઇનિંગ સુપરપાવર” તરીકે સંબોધિત કર્યું હતું. તેમણે સ્પષ્ટ કર્યું હતું કે જેમ-જેમ વેનેઝુએલામાં કાચા તેલનું ઉત્પાદન વધશે, તેમ-તેમ ભારત વૈશ્વિક તેલ પુરવઠાને વધારવામાં અને વૈશ્વિક અર્થતંત્રને સ્થિર રાખવામાં અત્યંત મહત્વપૂર્ણ ભૂમિકા ભજવી શકે છે. ભારત પાસે ભારે કાચા તેલ (હેવી ક્રૂડ) ને શુદ્ધ કરવાની શાનદાર ક્ષમતા રહેલી છે.

આ મુલાકાતનો મુખ્ય ઉદ્દેશ્ય વાશિંગ્ટન અને નવી દિલ્હી વચ્ચે ઊર્જા રોકાણ અને સુરક્ષાના ક્ષેત્રમાં વધતા સંબંધોને વધુ મજબૂત કરવાનો છે. અમેરિકા ભારત પર સતત ભાર મૂકી રહ્યો છે કે તે રશિયામાંથી થતી ઊર્જા આયાતને ઘટાડીને પોતાના ઊર્જા સ્ત્રોતોમાં વિવિધતા લાવે. વૈશ્વિક સ્તરે ઇરાન અને યમન સાથે જોડાયેલા સંઘર્ષો તથા હોર્મુઝ સ્ટ્રેટ અને લાલ સમુદ્ર જેવા મહત્વપૂર્ણ દરિયાઈ માર્ગો પર સર્જાયેલા ભૌગોલિક તણાવના કારણે ઊર્જા સુરક્ષાને લઈને ચિંતાઓ વધી છે, ત્યારે જામનગર જેવી વિશાળ રિફાઈનરી વૈશ્વિક સ્તરે સંકટના સમયમાં મોટી રાહત આપી શકે છે.

ઉલ્લેખનીય છે કે જામનગર સ્થિત રિલાયન્સની આ રિફાઈનરીમાં દરરોજ અંદાજે 1.4 મિલિયન બેરલ કાચું તેલ પ્રોસેસ કરવાની ક્ષમતા રહેલી છે. આ અદ્યતન સુવિધાઓ દ્વારા કાચા તેલને ગેસોલિન અને ડિઝલ જેવા ઇંધણમાં ફેરવવામાં આવે છે, સાથે જ પ્લાસ્ટિક અને સિન્થેટિક ફાઈબર માટેના પેટ્રોકેમિકલ ઉત્પાદનો પણ તૈયાર થાય છે. આ રિફાઈનરી મુકેશ અંબાણી માટે તેમનો સૌથી કિંમતી 'ક્રાઉન જ્વેલ' સમાન છે. આંતરરાષ્ટ્રીય સ્તરે જામનગર માત્ર ઉદ્યોગ જગતમાં જ નહીં, પરંતુ અંબાણી પરિવારના ભવ્ય આયોજનો અને સાંસ્કૃતિક કાર્યક્રમોને કારણે પણ વૈશ્વિક નકશા પર એક આગવી ઓળખ ધરાવે છે.