ફ્રાન્સમાં મોંઘવારી અને સરકારી સેવાઓની કથળેલી સ્થિતિ સામે શરૂ થયેલા વિરોધ પ્રદર્શનોએ હિંસક સ્વરૂપ ધારણ કરતાં દેશના અનેક શહેરોમાં ભારે અરાજકતા સર્જાઈ છે. સતત બે રાતથી ચાલી રહેલી આગચંપી, તોડફોડ અને લૂંટફાટની ઘટનાઓ વચ્ચે લગભગ ૨૪૦૦ લોકોની ધરપકડ કરવામાં આવી છે. પ્રદર્શનકારીઓ અને પોલીસ વચ્ચેની અથડામણમાં આશરે ૧૦૦૦ પોલીસકર્મીઓ ઘાયલ થયા હોવાનું ગૃહમંત્રી લોરાં નુનેઝે જણાવ્યું છે.શનિવારે ફ્રાન્સના વિવિધ શહેરોમાં પાંચ લાખથી વધારે લોકોએ વિરોધ પ્રદર્શનમાં ભાગ લીધો હતો. મોટા ભાગના દેખાવકારો શાંતિપૂર્ણ રીતે વિરોધ નોંધાવી રહ્યા હતા, પરંતુ કેટલાક વિસ્તારોમાં ટોળાંએ દુકાનો લૂંટી, પોલીસનાં વાહનોને નિશાન બનાવ્યાં અને સરકારી ઇમારતોમાં આગ લગાડી હતી. રવિવારે પણ પેરિસ અને માર્સેઈમાં પ્રદર્શનકારીઓ તથા સુરક્ષા દળો વચ્ચે અથડામણો ચાલુ રહી હતી.પેરિસના પ્લાસ દ લા રિપબ્લિક વિસ્તારમાં પોલીસને ટોળાંને વિખેરવા માટે અશ્રુવાયુના ગોળા છોડવા પડ્યા હતા. કેટલાક દેખાવકારોએ રસ્તાઓ ઉપર સાયકલોના ઢગલા કરીને આગ લગાડી દીધી હતી. મોંઘી ચીજવસ્તુઓ વેચતી દુકાનો ઉપરાંત સુપરમાર્કેટને પણ લૂંટફાટનું નિશાન બનાવવામાં આવ્યાં હતાં.મધ્ય ફ્રાન્સના લિમોજ શહેરમાં ઐતિહાસિક ટાઉનહોલની ઇમારતમાં આગ લાગતાં ભારે નુકસાન થયું હતું. ઇમારતનો ઘડિયાળ ધરાવતો મિનારો ધરાશાયી થયો હતો. શહેરના મેયર ગિયોમ ગેરાંએ જણાવ્યું કે ટાઉનહોલને જાણીજોઈને નિશાન બનાવવામાં આવ્યું હતું. તેમણે સમારકામ માટે સરકાર તરફથી પૂરતી મદદ નહીં મળે તો રાજીનામું આપવાનો વિચાર કરવાની ચેતવણી આપી છે.ફ્રાન્સની મોટી રિટેલ કંપની કેરેફોરના ૫૦ સ્ટોરને નુકસાન થયું છે. તેમાંથી ૨૦ સ્ટોરમાં લૂંટફાટ થઈ હતી. કંપનીએ કરોડો યુરોના નુકસાનનો અંદાજ રજૂ કર્યો છે.પ્રમુખ ઇમેન્યુઅલ મેક્રોંએ રવિવારે રાષ્ટ્રને સંબોધતાં હિંસાની આકરી નિંદા કરી હતી. તેમણે સ્વીકાર્યું કે મોંઘવારી અને જાહેર સેવાઓ અંગે નાગરિકોની કેટલીક ફરિયાદો વાજબી છે, પરંતુ કોઈ પણ કારણ હિંસાને ન્યાયી ઠરાવી શકે નહીં. મેક્રોંએ રાષ્ટ્રીય કટોકટી જાહેર કરી નથી, જોકે સ્થાનિક વહીવટીતંત્રને જરૂર પડે ત્યાં ચોક્કસ પ્રદર્શનો ઉપર પ્રતિબંધ મૂકવાની સત્તા આપવાની તૈયારી દર્શાવી છે.