૧૨.૩૬ લાખથી વધુ મતદારો સુધી એન્યુમરેશન ફોર્મ્સ (EFs)ના વિતરણની કામગીરી પૂર્ણ કરાઈ

૮.૨૦ લાખ જેટલા ફોર્મ્સનું ડિજિટાઇઝેશન પણ સફળતાપૂર્વક પૂર્ણ

ફોર્મ્સ ભરી પરત આપવાના બાકી હોય તેવા મતદારોને તાત્કાલિક તેમના BLO અથવા નજીકના મતદાર નોંધણી અધિકારીની કચેરી, મદદનીશ મતદાર નોંધણી અધિકારીની કચેરીનો સંપર્ક કરી ફોર્મ પરત કરવા જિલ્લા ચૂંટણી તંત્રની અપીલ

જામનગર જિલ્લામાં ભારતના ચૂંટણી પંચના નિર્દેશ મુજબ જિલ્લા ચૂંટણી અધિકારી અને જિલ્લા કલેકટર કેતન ઠક્કરના માર્ગદર્શન હેઠળ હાલમાં સ્પેશિયલ ઇન્ટેન્સિવ રિવિઝન (SIR) હેઠળ મતદાર યાદી સુધારણાની મહત્વની કામગીરી પૂરજોશમાં ચાલી રહી છે.

જિલ્લામાં હાલ કુલ ૧૨,૪૧,૦૯૭ મતદારો નોંધાયેલા છે, જેના માટે ૧,૨૪૨ પોલિંગ સ્ટેશનો પર કામ ચાલી રહ્યું છે. કુલ મતદારોમાંથી, ૧૨,૩૬,૪૬૪ જેટલા એન્યુમરેશન ફોર્મ્સ (EFs)નું વિતરણ થઈ ચૂક્યું છે.આ ફોર્મ્સ ભરાઈ ગયા પછી તે માહિતી ડિજિટાઇઝેશનની કામગીરી હાલ ઝડપભેર શરૂ છે જેમાં અત્યાર સુધીમાં ૮,૨૦,૪૩૧ જેટલા ફોર્મ્સનું ડિજિટાઇઝેશન સફળતાપૂર્વક પૂર્ણ થઈ ગયું છે.આ આંકડો વિતરણ થયેલા ફોર્મ્સના ૬૬.૧૧% જેટલો થાય છે.

આગામી તારીખ 29/11/2025 ના બપોરે 12:00 થી સાંજે 05:00 વાગ્યા સુધી અને તારીખ 30/11/2025 ના સવારે 10:00 વાગ્યાથી સાંજે 05:00 વાગ્યા સુધી વિધાનસભા મતદાર વિભાગની મામલતદાર કચેરી સ્પેશિયલ કેમ્પ નું આયોજન કરવામાં આવનાર છે. જેમાં જે મતદારોને ગણતરી ફોર્મ મેળવવાના બાકી છે તેઓ પોતાના ફોર્મ મેળવી શકશે, પોતાના ગણતરી ફોર્મમાં વિગતો મેળવવા-ભરાવવામાં માર્ગદર્શન મેળવી શકાશે તેમજ પોતાના ભરેલા ગણતરી ફોર્મ પરત કરી શકશે.