શહેરના યુનિવર્સિટી રોડ પર ઇન્દિરા સર્કલ પાસે રોયલ પાર્કમાં નિર્માાણાધિન બિલ્ડિંગ સાઇટ પર કામ કરતા શ્રમિક આધેડનું અકસ્માતે સાતમાં માળેથી નીચે પટકાતા ગંભીર ઇજા થવા સબબ મોત થયું હતું. પ્રિય દર્શન સોસાયટીમાં રહેતા આધેડ સેન્ટ્રીંગ કામ કરતા હતા. ત્યારે આ બનાવ બન્યો હતો.બનાવને પગલે શ્રમિકના પરિવારમાં ગમગીની છવાય ગઇ હતી.

બનાવની જાણવા મળતી વિગતો મુજબ, 80 ફૂટ રોડ પર આવેલી પ્રિયદર્શન સોસાયટીમાં રહેતા હસમુખભાઇ શામજીભાઇ ભરડવા (ઉ.વ.46)નામના આધેડ આજે સવારે 10 વાગ્યાના અરસામાં ઇન્દિરા સર્કલ પાસે રોયલ પાર્ક શેરી નં.8માં ડાયમંડ ગૃપની પરમભાઇની નિર્માણધીન બિલ્ડિંગ સાઇટ પર સેન્ટ્રીંગનું કામ કરતા હતા. દરમિયાન અકસ્માતે સાતમાં માળેથી નિચે પટકાતા તેમને માથાનાભાગે તથા શરીરે ગંભીર ઇજા થતા તાત્કાલીક સારવાર માટે સરકારી હોસ્પિટલમાં ખસેડવામાં આવ્યા હતા. અહીં સારવાર કારગત નીવડે તે પૂર્વે જ તેમનું મોત થયું હતું.

આ અંગે સિવિલ ચોકીના સ્ટાફે પ્રાથમિક નોંધ કરી યુનિવર્સિટી પોલીસને જાણ કરતા પોલીસે હોસ્પિટલે દોડી જઇ જરૂરી કાર્યવાહી હાથ ધરી હતી. પ્રાથમિક તપાસમાં મૃતક હસમુખભાઇ ત્રણભાઇમાં મોટા અને તેમને સંતાનમાં ત્રણ પુત્ર હોવાનું જાણવા મળ્યુ છે. આ બનાવથી પ્રજાપતિ પરિવારમાં ગમગીની છવાઇ ગઇ હતી.