ભારતનો પ્રતિભાશાળી ક્રિકેટર હાર્દિક પંડ્યા હવે વિશ્વનો નંબર-1 ઓલરાઉન્ડર બની ગયો છે. હાર્દિક પંડ્યા આંતરરાષ્ટ્રીય ક્રિકેટની તાજેતરની T20 આંતરરાષ્ટ્રીય રેન્કિંગમાં નંબર વન ઓલરાઉન્ડર બની ગયો છે. તેણે ઈંગ્લેન્ડના લિયામ લિવિંગસ્ટોનને પાછળ છોડીને T20 ઈન્ટરનેશનલ રેન્કિંગમાં પ્રથમ ઓલરાઉન્ડરનું સ્થાન મેળવ્યું.

હાર્દિક પંડ્યા T20 ઈન્ટરનેશનલમાં પહેલીવાર વર્લ્ડ નંબર વન નથી બન્યો. તે આ પહેલા પણ ફોર્મેટની રેન્કિંગમાં પ્રથમ સ્થાન હાંસલ કરી ચૂક્યો છે. તે T20 ઈન્ટરનેશનલમાં ટીમ ઈન્ડિયાનો મહત્વનો ખેલાડી છે. હાર્દિક બોલ અને બેટ બંનેમાં શાનદાર ફોર્મ જાળવી રાખે છે.

આ વર્ષે એટલે કે 2024માં હાર્દિક પંડ્યાએ T20 ઈન્ટરનેશનલમાં 352 રન બનાવ્યા છે. આ સાથે તેણે આ વર્ષે 16 વિકેટ પણ લીધી છે. સાઉથ આફ્રિકા સામેની T20 સિરીઝની છેલ્લી મેચમાં હાર્દિકે શાનદાર બોલિંગ કરી હતી. આ મેચમાં હાર્દિકે ત્રણ ઓવરમાં એક મેડન સાથે માત્ર આઠ રન આપ્યા અને એક વિકેટ લીધી.

ટી20 ઈન્ટરનેશનલની તાજેતરની રેન્કિંગમાં હાર્દિક પંડ્યા 244 રેટિંગ પોઈન્ટ સાથે નંબર વન પર છે. નેપાળના દીપેન્દ્ર સિંહ એરી બીજા સ્થાને છે. અગાઉ ઈંગ્લેન્ડનો લિયામ લિવિંગસ્ટોન ટોપ પર હતો પરંતુ હવે તે ત્રીજા નંબરે પહોંચી ગયો છે.

આઈસીસીની તાજેતરની રેન્કિંગમાં ઓસ્ટ્રેલિયાના માર્કસ સ્ટોઈનિસ ચોથા સ્થાને અને શ્રીલંકાના ભૂતપૂર્વ કેપ્ટન વાનિન્દુ હસારાંગા પાંચમા સ્થાને છે. સ્ટોઇનિસ પાસે આગળ આવવાની તક હતી પરંતુ તે પાકિસ્તાન સામેની T20 સિરીઝમાં સારું પ્રદર્શન કરી શક્યો નહોતો. સ્ટોઇનિસે ત્રીજી T20માં બેટથી ચોક્કસપણે હલચલ મચાવી હતી.

એ પછી અફઘાનિસ્તાનનો મોહમ્મદ નબી છઠ્ઠા સ્થાને છે, જ્યારે ઝિમ્બાબ્વેનો કેપ્ટન સિકંદર રઝા સાતમા સ્થાને છે. એ પછી T-20 ઈન્ટરનેશનલમાં ઓલરાઉન્ડરોની રેન્કિંગમાં વેસ્ટ ઈન્ડિઝનો રોમારિયો શેફર્ડ આઠમા સ્થાને છે. પછી દક્ષિણ આફ્રિકાનો એડન માર્કરામ 9માં અને ગેરહાર્ડ ઈરાસ્મસ 10માં નંબર પર છે.