પોલીસ સૂત્રોમાંથી મળતી વિગતો મુજબ જેતપુર તાબેના મંડલીકપુર ગામે રહેતા અને તાલુકા પંચાયતમાં સભ્ય તરીકે સેવા આપતા તેમજ જેતલસર હાઈસ્કૂલમાં ફરજ બજાવતા જીગ્નેશ રામજીભાઈ રાદડિયા ઉંમર વર્ષ 43 વાળાએ જેતપુર તાલુકા પોલીસ મથકમાં ફરિયાદ નોંધાવી હતી.

ફરિયાદમાં જીગ્નેશભાઈએ જણાવ્યા મુજબ મંડલીકપુર ગામમાં રહેતા મેહુલભાઈ સેંજલીયા અને હિરેનભાઈ રાદડિયા ઓન્લી મંડલીકપુર નામનું વોટ્સએપ ગ્રુપ ચલાવતા હોય અને બંને તેમાં એડમીન તરીકે હોય જે ગ્રુપમાં જીગ્નેશભાઈ પણ જોડાયા હતા.

આ ગ્રુપમાં મંડલીકપુર ગામના 295 જેટલા સભ્યો જોડાયેલ હોય અને આ ગ્રુપમાં મંડલીકપુર ગામની ગામલક્ષી માહિતી આપવામાં આવતી હોય આ ગ્રુપમાં હાલ સુરત રહેતા મૂળ મંડલીકપુરના અજય વલ્લભભાઈ સેંજલીયા પણ જોડાયેલ હોય તેમજ ગામના સરપંચ શિલ્પાબેન નરેશભાઈ સીંજલીયા તથા તેના પતિ હરેશભાઈ છગનભાઈ સેંજલીયા છે.

જેથી જીગ્નેશભાઈએ ગામના કામ બાબતે સરપંચ શિલ્પાબેન સેંજલીયા અને તેના પતિ હરેશભાઈ સેંજલીયા વિરુદ્ધ વિડિયો ને અરજી કરી હતી તેના થોડા દિવસ બાદ ડીડીઓ દ્વારા કારણદર્શક નોટિસ ફટકારવામાં આવતા જે અંગેનોખા રાખી હાલ સુરત રહેતા અજય સેંજલીયાએ વોટ્સએપ ગ્રુપમાં જીગ્નેશભાઈને ગાળો આપી અવારનવાર ફોન પર ગાળો ભાંડી જાનથી મારી નાખવાની ધમકીઓ આપતા તે અંગેના ગ્રુપમાં મેસેજના સ્ક્રીનશોટ લઈ જેતપુર તાલુકા પોલીસ મથકમાં અજય સેંજલીયા વિરુદ્ધ ફરિયાદ નોંધાવતા પોલીસે ગુનો દાખલ કરી ધોરણસરની કાર્યવાહી હાથ ધરી હતી.

અત્રે ઉલ્લેખનીય છે કે અગાઉ સરપંચની ચૂંટણીમાં ફરિયાદી જીગ્નેશ રાદડિયાને ચૂંટણી લડવી હતી જે બાબતે અગાઉ પણ મતભેદો ગામમાં ઊભા થયા હોય અને અગાઉ પણ બોલાચાલી થયા નું ગામના સૂત્રોમાંથી જાણવા મળ્યું છે.