ડિઝનીની નવી એનિમેટેડ એડવેન્ચર ફિલ્મ "ઝૂટોપિયા 2" એ યુએસમાં થેન્ક્સગિવિંગ વીકએન્ડ દરમિયાન વૈશ્વિક બોક્સ ઓફિસ પર જોરદાર કમાણી કરી છે. રવિવાર (નવેમ્બર 30) ના સ્ટુડિયો અંદાજ મુજબ ફિલ્મે ટિકિટ વેચાણ દ્વારા અંદાજિત $૫૫૬ મિલિયન (આશરે ₹૪૬૦૦ કરોડ) નો જંગી વકરો કર્યો છે. આ આંકડો બુધવારથી રવિવાર સુધીના પાંચ દિવસના વેચાણનું પ્રતિનિધિત્વ કરે છે, જે દર્શાવે છે કે દર્શકોએ સિક્વલને જબરદસ્ત પ્રતિસાદ આપ્યો છે.

આ સિક્વલમાં ફરી એકવાર ચાહકોના પ્રિય પાત્રો – શિખાઉ પોલીસ અધિકારી જુડી હોપ્સ (અવાજ: ગિનીફર ગુડવિન) અને તેના ભાગીદાર નિક વાઇલ્ડ (અવાજ: જેસન બેટમેન) ને પાછા લાવવામાં આવ્યા છે. સ્ટોરીમાં ટ્વિસ્ટ ત્યારે આવે છે જ્યારે ગેરી ડી'સ્નેક (અવાજ: કી હુય ક્વાન) ઝૂટોપિયામાં આવે છે અને આ બંને પોતાને એક નવા રહસ્યનો સામનો કરતા જોવા મળે છે.

"ઝૂટોપિયા 2" ની આ જબરદસ્ત સફળતા ડિઝનીની એનિમેશન ફિલ્મોની વૈશ્વિક અપીલ અને મજબૂત વાર્તા કહેવાની ક્ષમતાને વધુ એકવાર સાબિત કરે છે.

વિકેન્ડમાં અમેરિકામાં ધમાલ
આ ફિલ્મે ઉત્તર અમેરિકામાં સપ્તાહના અંતે $૯૬ મિલિયન ની કમાણી કરી હતી અને પાંચ દિવસના થેન્ક્સગિવિંગ ફ્રેમ દરમિયાન $૧૫૬ મિલિયન નો આંકડો પાર કર્યો હતો.

'વિકેડ' પણ રેસમાં
આ સપ્તાહના અંતે યુનિવર્સલ પિક્ચર્સની ફિલ્મ "વિકેડ: ફોર ગુડ" પણ બોક્સ ઓફિસ પર મજબૂત રહી હતી. તેણે સ્થાનિક સ્તરે બીજા સપ્તાહમાં વધુ $૬૨.૮ મિલિયન કમાવ્યા હતા, જેનાથી ઉત્તર અમેરિકામાં તેનું કુલ કલેક્શન $૨૭૦.૪ મિલિયન થયું છે. "વિકેડ" ની આ સિક્વલ વિશ્વભરમાં $૩૯૩ મિલિયન કમાવી ચૂકી છે. આ બંને સિક્વલ ફિલ્મોએ મળીને થેન્ક્સગિવિંગ વીકએન્ડ ને સિનેમાઘરો માટેના અત્યાર સુધીના 'અંધકારમય' વર્ષમાં એક આશાસ્પદ અપવાદ બનાવ્યો છે.

નોંધનીય છે કે "ઝૂટોપિયા 2" એ મૂળ "ઝૂટોપિયા" (૨૦૧૬) ના લગભગ એક દાયકા પછી આવી છે, જેણે માર્ચમાં સ્થાનિક સ્તરે $૭૫ મિલિયનનું ઓપનિંગ કર્યું હતું અને અપેક્ષાઓ કરતાં વધુ સફળ રહી હતી.