ડોનાલ્ડ ટ્રમ્પના ટેરિફની અસર ફક્ત ચીન સહીત વિશ્વભરના દેશો પર જ નહીં, પરંતુ અમેરિકન રાજ્યો પર પણ પડી છે. કેલિફોર્નિયાએ ટ્રમ્પ પર મનમાનીનો આરોપ લગાવીને કોર્ટમાં દાવો દાખલ કર્યો છે.

કેલિફોર્નિયાએ ટ્રમ્પ દ્વારા લાદવામાં આવેલા ટેરિફને રોકવા માટે ફેડરલ કોર્ટમાં દાવો દાખલ કર્યો છે. રાજ્યનો આરોપ છે કે ટ્રમ્પે પોતાની સત્તાનો દુરુપયોગ કર્યો છે અને તેનાથી માત્ર કેલિફોર્નિયા જ નહીં પરંતુ સમગ્ર દેશની અર્થવ્યવસ્થાને ગંભીર નુકસાન થયું છે.

ટ્રમ્પે બધા દેશોમાંથી આવતા માલ પર 10% ટેરિફ લાદ્યો છે. કેટલાક દેશો જે યુએસ આયાત પર ઊંચા અવરોધો લાદે છે, તેમના માટે દર વધુ ઊંચો છે. આ ઉપરાંત, ચીન પર 245% ટેરિફ લાદવામાં આવ્યો છે, જોકે કેટલાક ઇલેક્ટ્રોનિક સામાનને આમાંથી મુક્તિ આપવામાં આવી છે. બદલામાં, ચીને અમેરિકા પર ૧૨૫% ટેરિફ લાદ્યો છે અને યુરોપિયન યુનિયને પણ બદલો લેવાના ટેરિફને મંજૂરી આપી છે.

કેલિફોર્નિયા રાજ્ય દ્વારા દાખલ કરાયેલા મુકદ્દમામાં જણાવાયું છે કે ટેરિફ લાદવાની સત્તા બંધારણ હેઠળ કોંગ્રેસ પાસે છે, રાષ્ટ્રપતિ પાસે નહીં. ટ્રમ્પે ઇન્ટરનેશનલ ઇમરજન્સી ઇકોનોમિક પાવર્સ એક્ટનો ઉલ્લેખ કર્યો, પરંતુ તે કાયદો રાષ્ટ્રપતિને "તેઓ જે ઇચ્છે તે કર" લેવાની મંજૂરી આપતો નથી. નવા ટેરિફને કારણે શેર અને બોન્ડ બજારોમાં ભારે ઘટાડો થયો છે, જેના કારણે અબજો ડોલરની મૂડીનો નાશ થયો છે.

ટેરિફથી કેલિફોર્નિયા સૌથી વધુ પ્રભાવિત છે

કેલિફોર્નિયા, જે યુ.એસ.માં માલનો સૌથી મોટો આયાતકાર છે, અને 40% આયાત 12 બંદરો દ્વારા થાય છે, તેને સૌથી વધુ ફટકો પડ્યો છે. ૨૦૨૨માં ૨૩.૬ બિલિયન ડોલરની કૃષિ નિકાસનો અંદાજ છે, જે હવે જોખમમાં છે અને હજારો નોકરીઓને અસર કરી શકે છે.

વ્હાઇટ હાઉસનો પ્રતિભાવ

વ્હાઇટ હાઉસના પ્રવક્તા કુશ દેસાઇએ આ કાર્યવાહી અંગે કેલિફોર્નિયાના ગવર્નર ગેવિન ન્યૂસમ પર નિશાન સાધતા કહ્યું, તેમણે ટ્રમ્પના ટેરિફને રોકવાનો પ્રયાસ ન કરીને, ગુના, બેઘરતા અને ફુગાવા જેવી તેમના રાજ્યની સમસ્યાઓ પર ધ્યાન કેન્દ્રિત કરવું જોઈએ.