જામનગર એસ.ટી. વિભાગમાં ભેદભાવ અને પક્ષપાતના આક્ષેપો

October 26, 2026 03:16 PM

ગુજરાત રાજ્ય માર્ગ વાહનવ્યવહાર નિગમ (એસ.ટી.)ના જામનગર વિભાગમાં ફરજ બજાવતાં મહિલા કંડક્ટરે વિભાગીય કચેરીના ઉચ્ચ અધિકારીઓ સામે જાતિગત ભેદભાવ, યુનિયનની હરીફાઈ અને બદલાની ભાવનાથી અન્યાયી કાર્યવાહી કરાતી હોવાના ગંભીર આક્ષેપો કર્યા છે. જામનગર ડેપોનાં મહિલા કંડક્ટર રચનાબેન જેઠવાએ ગુજરાત રાજ્ય મહિલા આયોગ, ગાંધીનગરનાં અધ્યક્ષને લેખિત રજૂઆત કરીને વિભાગીય નિયામક બી.સી. જાડેજા અને વિભાગીય પરિવહન અધિકારી જે.વી. ઈશરાણી સામે તટસ્થ તપાસ કરી ન્યાય અપાવવા માંગણી કરી છે.

મહિલા કંડક્ટરની રજૂઆત મુજબ, તેઓ જામનગર-હર્ષદ રૂટ પર ફરજ બજાવી રહ્યાં હતાં તે દરમિયાન ડબલ ડ્યુટી અને પિતાની બીમારીની પરિસ્થિતિ વચ્ચે બસમાં ટેકનિકલ ખામી સર્જાઈ હતી. આ અંગે ડ્રાઈવર દ્વારા જામનગર ડેપોને જાણ કરવામાં આવી હતી અને બસ ભાટિયાથી પરત વાળવામાં આવતાં તે વહેલી ખંભાળિયા ડેપોએ પહોંચી હતી. આ દરમિયાન ખંભાળિયા ડેપોમાં ફરજ બજાવતા ટી.સી. હરદેવસિંહ જાડેજા સાથે બોલાચાલી થઈ હતી.

આ વિવાદ અંગે ખંભાળિયાના ડેપો મેનેજરની હાજરીમાં બંને પક્ષો વચ્ચે લેખિત સમાધાન થયું હતું આ ઉપરાંત તેમની દ્વારકા ડેપો ખાતે બદલી કરી દેવામાં આવી હતી અને વિભાગીય નિયામક દ્વારા રૂ. ૪,૦૦૦નો દંડ પણ ફટકારવામાં આવ્યો હોવાનો આક્ષેપ કરાયો છે.

રજૂઆતમાં વધુમાં જણાવાયું છે કે સંબંધિત પરિપત્ર મુજબ કેસની કાર્યવાહી ૩૦ દિવસમાં પૂર્ણ કરવાની જોગવાઈ હોવા છતાં આ મામલે કાર્યવાહી બે મહિના સુધી લંબાવવામાં આવી હતી. વિભાગીય કચેરીમાં નિયમોનો સમાન અમલ થતો ન હોવાનો અને કેટલાક કર્મચારીઓની બદલી સહિતના નિર્ણયો લેવામાં પક્ષપાતી વલણ અપનાવાતું હોવાનો પણ મહિલા કંડક્ટરે આક્ષેપ કર્યો છે. સમગ્ર મામલે તટસ્થ તપાસ હાથ ધરવામાં આવે અને જવાબદાર અધિકારીઓ સામે નિયમોનુસાર યોગ્ય કાર્યવાહી કરવામાં આવે તેવી માંગ કરવામાં આવી છે. આ રજૂઆતની નકલો એસ.ટી. નિગમની અમદાવાદ મધ્યસ્થ કચેરીના ઉચ્ચ અધિકારીઓને પણ મોકલવામાં આવી હોવાનું જણાવાયું છે.

લાઈક અને ફોલો કરો અમારું ફેસબુક પેજ FACEBOOK - AAJKAALDAILY

ફોલો કરો અમારું ઇન્સ્ટાગ્રામ INSTAGRAM - AAJKAALDAILY

સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY

મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં 99251 12230

View News On Application

જામનગર એસ.ટી. વિભાગમાં ભેદભાવ અને પક્ષપાતના આક્ષેપો

Recent News

Gujarat's No. 1 evening newspaper