જામનગરમાં ભણશાળી વાડ નજીક ભયજનક બાંધકામ તોડી પડાયું 

મનપાની એસ્ટેટઅને ટીપીઓ શાખાની સંયુકત કાર્યવાહી : એક માળના મકાનનો જોખમી હીસ્સો જમીનદોસ્ત કરાયો

જામનગરમાં ભણશાળી વાડ નજીક ભયજનક બાંધકામ મનપાની એસ્ટેટ અને ટીપીઓ શાખાએ તોડી પાડયું છે. એક માળના મકાનનો જોખમી હીસ્સો જમીનદોસ્ત કરાયો હતો.આ કાર્યવાહી દરમ્યાન લોકોના ટોળા ઉમટી પડયા હતાં.
જામનગરમાં ચોમાસા પૂર્વે જોખમી ઇમારતોના આસામીઓને દર વર્ષની જેમ આ વર્ષે પણ મનપાએ નિયમ મુજબ નોટીસ ફટકારી હતી. જેમાં ઇમારતનો જોખમી ભાગ તોડી પાડી સલામત સ્ટેજે લઇ જવા તાકીદ કરવામાં આવી હતી. આમ છતાં મોટાભાગના આસામીઓએ ઇમારતોના જોખમી ભાગ દૂર કર્યા નથી. મનપાની એસ્ટેટ અને ટીપીઓ શાખા દ્વારા ગઇકાલે વોર્ડ નં.૧૩માં ભણશાળી વાડ નજીક એક માળના મકાનનો જોખમી ભાગ તોડી પાડવા માટે કાર્યવાહી હાથ ધરવામાં આવી હતી. જે અંતર્ગત ઇમારતનો ભયજનક ભાગ તોડી પડાયો હતો. મનપાની આ કાર્યવાહીના પગલે લોકોના ટોળાં ઉમટી પડયા હતાં.