અકસ્માતના આ બનાવની જાણવા મળતી વિગતો મુજબ, મૂળ ભાણવડના મેવાસા ગામના વતની અને હાલ જામનગરમાં રહેતા વિરમભાઈ હીરાભાઈ ચાવડા (ઉ.વ. 65) તથા તેમના નાના ભાઈ ઝીણાભાઈ હીરાભાઈ ચાવડા (રહે. મેવાસા) બંને બાઈક પર ઢાંકથી મેરવદર તરફ જતા હતા ત્યારે રસ્તામાં રોંગ સાઇડમાં ધસી આવેલા ટ્રેક્ટરે બાઇકને હડફેટ લેતા બંને ભાઈઓ રોડ પર પટકાયા હતા. જેથી તેમને સારવાર માટે હોસ્પિટલ ખસેડવામાં આવ્યા હતાં. ગંભીર ઈજા થવા સબબ ઝીણાભાઈ ચાવડાનું મોત થયું હતું જ્યારે વિરમભાઈને પગમાં ઈજા પહોંચી હતી.

વધુમાં જાણવા મળતી વિગતો મુજબ, વિરમભાઈ તથા તેમના નાના ભાઈ ઝીણાભાઈ બંને ગઈકાલ સવારના 7:30 વાગ્યે બાઈક લઈ મેવાસા ગામથી દીકરીના સંબંધની વાત કરવા માટે ઉદેપુર ગામ ગયા હતા. ત્યાંથી ખાગેશ્રી થઇ રબારીકા ગામે ગયા હતા. જ્યાં સંબંધીના ઘરે આટો મારી ઢાંક પાસે આવ્યા હતા અને સાંજના સમયે ઢાંક ગામેથી ગોકરણ જતા હતા દરમિયાન મેરવદર ગામ પાસે અકસ્માતની આ ઘટના બની હતી. બનાવ અંગે વૃદ્ધ વિરમભાઈ ચાવડાની ફરિયાદ પરથી ભાયાવદર પોલીસે ટ્રેક્ટર ચાલક સામે ગુનો નોંધી કાયદેસરની કાર્યવાહી કરી હતી.