જામનગર: બજરંગપુર-વેરતીયામાં ઘરફોડ ચોરીનો ભેદ ઉકેલાયો

સગીરની અટક કરતી એલસીબી : ૧.૫૧ લાખનો મુદ્દામાલ કબજે : લતીપરના શખ્સની સંડોવણી

જામનગર તાલુકાના બજરંગપુર (વેરતીયા) ગામે હાઈસ્કૂલ નજીક બંધ મકાનમાં થયેલી ઘરફોડ ચોરીનો જામનગર એલ.સી.બી.એ ભેદ ઉકેલી કાઢ્યો છે. ચોરીના ગુનામાં એક કિશોરને ઝડપી લઈ તેની પાસેથી સોના-ચાંદીના દાગીના, રોકડ રકમ, મોબાઈલ ફોન તથા ગુનામાં ઉપયોગમાં લેવાયેલ મોટરસાયકલ સહિત કુલ ૧,૫૧,૫૦૦નો મુદ્દામાલ કબજે કરવામાં આવ્યો છે. 

રાજકોટ વિભાગના પોલીસ મહાનિરીક્ષક તથા જામનગર જિલ્લાના પોલીસ અધિક્ષક ડો. રવિ મોહન સૈનીની સૂચના અને માર્ગદર્શન હેઠળ જામનગર જિલ્લામાં નોંધાયેલા વણઉકેલાયેલા ચોરીના ગુનાઓ શોધી કાઢવા એલ.સી.બી.ના પોલીસ ઇન્સ્પેક્ટર વી.બી. ચૌધરીના માર્ગદર્શન હેઠળ પોલીસ સબ ઇન્સ્પેક્ટર એમ.વી. ભાટીયા તથા સ્ટાફની અલગ-અલગ ટીમો બનાવવામાં આવી હતી. ટીમો દ્વારા સીસીટીવી ફૂટેજ ચકાસવા ઉપરાંત ટેકનિકલ સોર્સનો ઉપયોગ કરી ચોરીના ગુનાઓ અંગે તપાસ હાથ ધરવામાં આવી હતી.
​​​​​​​
દરમિયાન એલ.સી.બી.ના ભરતભાઈ ડાંગર, ધર્મેન્દ્રસિંહ જાડેજા, ધનશ્યામભાઈ ડેરવાડિયા તથા કિશોરભાઈ પરમારને મળેલી ખાનગી બાતમીના આધારે ખીજડિયા બાયપાસ નજીકથી એક કાયદાના સંઘર્ષમાં આવેલ કિશોરને ઝડપી લેવામાં આવ્યો હતો.

પોલીસ તપાસમાં સામે આવ્યું હતું કે, આશરે દસ-બાર દિવસ અગાઉ આ ટાબરીયા સંજય રાયધનભાઈ દેવીપૂજક, રહે. લતીપર રોડ, દેવીપૂજક વાસ, ધ્રોલ, સાથે મોટરસાયકલ પર બજરંગપુર (વેરતીયા) ગામે ગયો હતો. બપોર બાદ આશરે પાંચ વાગ્યાના સમયે હાઈસ્કૂલ પાસે આવેલા એક બંધ મકાનના દરવાજાનું તાળું તોડી અંદર પ્રવેશ કરી કબાટમાંથી સોના તથા ચાંદીના દાગીનાની ચોરી કરવામાં આવી હતી.

પોલીસે સગીર પાસેથી સોનાની બે કાનની બુટી, આશરે રૂ.૫૦ હજારની કિંમતની, ચાંદીની એક લકી આશરે રૂ.૧૦ હજાર, રોકડા રૂ.૧,૫૦૦, ગુનામાં ઉપયોગમાં લેવાયેલ રૂ.૧૦ હજારની કિંમતનો મોબાઈલ ફોન તથા જી.જે.૧૦ ઇ.કે.૪૭૯૮ નંબરની આશરે રૂ.૮૦ હજારની કિંમતની મોટરસાયકલ મળી કુલ રૂ.૧,૫૧,૫૦૦નો મુદ્દામાલ કબજે કર્યો છે. આ અંગે પંચ-એ ડિવિઝન પોલીસ મથકમાં ભારતીય ન્યાય સંહિતા-૨૦૨૩ની કલમ ૩૩૧(૩) તથા ૩૦૫ મુજબ ગુનો નોંધાયેલ છે. કાયદાના સંઘર્ષમાં આવેલ કિશોર સામે એ.એસ.આઈ. અરજણભાઈ કોડીયાતરે કાયદેસરની કાર્યવાહી હાથ ધરી છે, જ્યારે ફરાર આરોપી સંજય રાયધનભાઈ દેવીપૂજકને ઝડપી પાડવા તપાસ લંબાવી છે.