જામખંભાળીયામાં લેન્ડ રેકર્ડ વર્ગ-૩ કર્મચારીઓની અચોક્કસ મુદતની હડતાલ

પડતર પ્રશ્નોનું નિરાકરણ ન આવતા આંદોલનનો માર્ગ અપનાવ્યો 

ગુજરાત રાજ્ય લેન્ડ રેકર્ડ વર્ગ-૩ કર્મચારી મંડળ, દેવભૂમિ દ્વારકા જિલ્લા યુનિટ દ્વારા કર્મચારીઓના લાંબા સમયથી પડતર પ્રશ્નોના નિરાકરણ માટે આંદોલનાત્મક કાર્યક્રમ જાહેર કરવામાં આવ્યો છે.જેમાં મંડળ દ્વારા અગાઉ તા. ૧૫/૦૯/૨૦૨૫ના રોજ રજૂઆત કરી કર્મચારીઓના પડતર પ્રશ્નોનું નિરાકરણ લાવવા માંગ કરવામાં આવી હતી. તેમ છતાં પ્રશ્નોનું સંતોષકારક નિરાકરણ ન આવતાં કર્મચારી મંડળે આંદોલનનો માર્ગ અપનાવવાનો નિર્ણય કર્યો છે.

મંડળની મુખ્ય માંગણીઓમાં છે જેમાં સિનિયર સર્વેયર સંવર્ગનું પગારધોરણ રૂ. ૨૫,૪૦૦-૮૧,૯૦૦, પે મેટ્રિક લેવલ-૪ (ગ્રેડ પે રૂ. ૨,૮૦૦)માંથી વધારી રૂ. ૩૫,૪૦૦-૧,૧૨,૪૦૦, પે મેટ્રિક લેવલ-૬ (ગ્રેડ પે રૂ. ૪,૨૦૦) કરવા માંગ,સર્વેયર સંવર્ગનું પગારધોરણ રૂ. ૨૫,૪૦૦-૮૧,૯૦૦, પે મેટ્રિક લેવલ-૪ (ગ્રેડ પે રૂ. ૨,૪૦૦)માંથી રૂ. ૨૫,૪૦૦-૮૧,૯૦૦, પે મેટ્રિક લેવલ-૫ (ગ્રેડ પે રૂ. ૨,૮૦૦) કરવા માંગનો સમાવેશ થાય છે.

આ માંગણીઓના નિરાકરણ માટે મંડળ દ્વારા તબક્કાવાર આંદોલન કાર્યક્રમ જાહેર કરવામાં આવ્યો હતો. જેમાં તા. ૧૧/૦૯/૨૦૨૫થી તા. ૧૮/૦૯/૨૦૨૫ સુધી રાજ્યના તમામ કર્મચારીઓ કચેરીમાં હાજર રહી પેનડાઉન કરી તમામ પ્રકારની કામગીરી બંધ રાખી વિરોધ દર્શાવ્યો હતો .તા. ૧૯/૦૯/૨૦૨૫ના રોજ રાજ્યના તમામ કર્મચારીઓ સામૂહિક કેઝ્યુઅલ લીવ પર રહ્યા હતા. ત્યારબાદ તા. ૨૧/૦૯/૨૦૨૫થી રાજ્યના તમામ કર્મચારીઓ જિલ્લા મથકે રહી અચોક્કસ મુદતની હડતાળ પર ગયેલ છે.

કર્મચારી મંડળે સરકાર સમક્ષ રજૂઆત કરી છે કે કર્મચારીઓના ઉપરોક્ત પડતર પ્રશ્નોનો તાત્કાલિક અને હકારાત્મક રીતે ઉકેલ લાવવામાં આવે, જેથી આંદોલનાત્મક કાર્યક્રમ આગળ વધારવાની જરૂરિયાત ન રહે.હાલ આ તમામ ગુજરાત રાજ્ય લેન્ડ રેકર્ડ વર્ગ ૩ કમેચારી મંડળ જિલ્લા યુનિટ અચોક્કસ મુદતની હડતાલ પર છે.તમામ આ કચેરીને લગતી કામગીરી બંધ છે.