દેવભૂમિ દ્વારકા જિલ્લામાં "આપણી આંગણવાડી આપણી જવાબદારી" થીમ અંતર્ગત તા. ૯ સપ્ટેમ્બરથી ૯મા ‘રાષ્ટ્રીય પોષણ માહ’ની ઉજવણી કરાશે

પોષણ માસની ઉજવણીના સુચારૂ આયોજન સંદર્ભે જિલ્લા પંચાયત ખાતે બેઠક યોજાઈ

સમગ્ર રાજ્યની સાથે દેવભૂમિ દ્વારકા જિલ્લામાં આજથી તા. ૦૯ સપ્ટેમ્બરથી તા. ૦૮ ઓક્ટોબર સુધી ૦૯મા ‘રાષ્ટ્રીય પોષણ માહ’ની ઉજવણી કરવામાં આવશે.

પોષણ સૂચકાંકોમાં સુધારો કરવા માટે દેશભરમાં પોષણ-કેન્દ્રિત સંવેદનશીલતા વધારવા 'આપણી આંગણવાડી આપણી જવાબદારી' થીમ સાથે એક માસ સુધી જન અભિયાનનું આયોજન કરવામાં આવ્યું છે. જેના સુચારૂ આયોજન સંદર્ભે જિલ્લા પંચાયત ખાતે બેઠક યોજાઈ હતી. 

મુખ્ય થીમ સાથે પોષણ માસ દરમિયાન આંગણવાડીમાં આહારની વિવિધતા અને પર્યાપ્ત પ્રોટીન, સામુદાયિક માલિકીપણું અને જવાબદારી, બાળપણના વિકાસ માટે પોષણ અને પ્રારંભિક ઉત્તેજન, પ્રધાનમંત્રી માતૃ વંદના યોજના અંતર્ગત માતાના સ્વાસ્થ્ય માટે રોકડ સહાય સહિતના કાર્યક્રમો યોજાશે. 

વિશેષમાં સ્વાસ્થ્ય મેળા, સ્વસ્થ અને વૈવિધ્યસભર રેસિપીનું પ્રદર્શન, આંગણવાડી ખાતે સાપ્તાહિક મેનુ રોટેશન, ગરમ રાંધેલા ભોજનનું નિદર્શન, પ્રધાનમંત્રી માતૃ વંદના યોજના અંતર્ગત ૧૦૦ ટકા નોંધણી ઝુંબેશનો પ્રારંભ કરવામાં આવશે.

આ બેઠકમાં ઈનચાર્જ પ્રોગ્રામ ઓફિસર સી.બી. ચોબીસા સહિત નોડલ અધિકારીઓ ઉપસ્થિત રહ્યાં હતાં.