દેવભૂમિ દ્વારકા: જામ ખંભાળિયામાં સફાઈ કર્મચારીઓ અને પાલિકા આમને-સામને

પ્રશ્નો નહીં ઉકેલાય તો સફાઈ કામ બંધ કરવાની ચીમકી

દેવભૂમિ દ્વારકા જિલ્લાના વડામથક જામ ખંભાળિયામાં સફાઈ કર્મચારીઓ અને નગરપાલિકાના સત્તાધીશો આમને-સામને આવી ગયા છે. કર્મચારીઓએ પોતાના વિવિધ પડતર પ્રશ્નો મુદ્દે ચીફ ઓફિસર સમક્ષ ઉગ્ર રજૂઆત કરી છે. કર્મચારીઓનો આક્ષેપ છે કે શહેરમાં વિસ્તાર અને વસ્તીમાં સતત વધારો થયો હોવા છતાં લાંબા સમયથી નવા સફાઈ કર્મીઓની ભરતી કરવામાં આવી નથી. ગત વર્ષે પાલિકાની સામાન્ય સભામાં નવી ભરતી અંગે ઠરાવ પસાર થયો હોવા છતાં તેનો કોઈ અમલ કરવામાં આવ્યો નથી.

આ ઉપરાંત નિવૃત્ત થયેલા કર્મચારીઓને છેલ્લા ત્રણથી ચાર મહિનાથી નિવૃત્તિ વિષયક લાભો મળ્યા ન હોવાની ફરિયાદ સાથે હક ફંડ સહિતના તમામ નાણાં તાત્કાલિક ચૂકવવાની માંગ ઉઠાવવામાં આવી છે. કર્મચારીઓની રજૂઆત સામે ચીફ ઓફિસરે જણાવ્યું હતું કે કારોબારી સમિતિની મંજૂરી મળ્યા બાદ નિવૃત્તિ લાભો ચૂકવવાની તજવીજ હાથ ધરાશે. તેમણે વધુમાં માહિતી આપી હતી કે સ્વચ્છ-સુંદર શહેર યોજના હેઠળ આશરે ૨૦ આઉટસોર્સ કર્મચારીઓની ભરતી કરાઈ છે અને આગામી સમયમાં સરકારની મંજૂરી મેળવીને વધુ ૪૫ થી ૫૦ રોજમદાર કે કરાર આધારિત સફાઈ કર્મીઓની ભરતી પ્રક્રિયા હાથ ધરવામાં આવશે.

દરમિયાન, સફાઈ કર્મચારીઓએ સ્પષ્ટ ચીમકી ઉચ્ચારી છે કે જો આજની બેઠકમાં તેમની માંગણીઓ અંગે કોઈ યોગ્ય નિર્ણય નહીં લેવાય તો સમગ્ર શહેરમાં સફાઈ કામગીરી સંપૂર્ણપણે બંધ કરી દેવામાં આવશે. જો કર્મચારીઓ હડતાળ પર ઉતરશે તો ગાંધી જયંતિ ટાણે જ ખંભાળિયા શહેરમાં ગંદકીની ગંભીર સમસ્યા સર્જાવાની દહેશત સેવાઈ રહી છે.