જામનગર શહેરમાં મહેસૂલી કર્મીઓની હડતાળનો બીજો દિવસ, રામધૂન બોલાવી સરકારને જગાડવાનો પ્રયાસ

October 08, 2026 03:02 PM

જામનગર શહેર-જિલ્લાની સરકારી કચેરીઓમાં ફરજ બજાવતા મહેસૂલી કર્મચારીઓ બઢતી, બદલી સહીતની પડતર માંગણીઓના નિરાકરણની માંગ સાથે અનિશ્ચિત મુદતની હડતાળ પર ઉતર્યા છે. હડતાળનો આજે બીજો દિવસ છે ત્યારે લાલબંગલા સ્થિત જૂની કલેક્ટર કચેરી પાસે મહેસૂલી કર્મચારીઓ દ્વારા છાવણી ઊભી કરી ધરણાં કરવામાં આવી રહ્યાં છે.

જૂની કલેક્ટર કચેરી પાસે આવેલી મહેસૂલી કર્મચારી મંડળની કચેરી નજીક બનાવવામાં આવેલી એક છાવણીમાં મહિલા કર્મચારીઓ હાથમાં બેનર-પોસ્ટરો સાથે ધરણાં પર બેઠાં હતાં, જ્યારે બાજુની બીજી છાવણીમાં પુરુષ કર્મચારીઓ પણ બેનર-પોસ્ટરો સાથે હડતાળ પર બેઠા હતા. કર્મચારીઓ દ્વારા પોતાની પડતર માંગણીઓનો વહેલી તકે ઉકેલ લાવવામાં આવે તેવી માંગ કરવામાં આવી રહી છે. આજે હડતાળના બીજા દિવસે સવારે ૧૧થી બપોરે ૧ વાગ્યા સુધી જૂની કલેક્ટર કચેરી ખાતે રામધૂનનો કાર્યક્રમ યોજવામાં આવ્યો હતો. કર્મચારીઓએ રામધૂન બોલાવી સરકારનું ધ્યાન પોતાની પડતર માંગણીઓ તરફ દોરવાનો પ્રયાસ કર્યો હતો.

ત્યારબાદ આજે બપોરે ૪થી ૫ વાગ્યા દરમિયાન મહેસૂલી કર્મચારીઓ બાલા હનુમાન મંદિર ખાતે પહોંચીને રામધૂનનો પાઠ કરશે અને હનુમાનજી મહારાજને પ્રાર્થના કરશે કે મહેસૂલ વિભાગ દ્વારા કર્મચારીઓની પડતર માંગણીઓનું સંજ્ઞાન લેવામાં આવે અને હડતાળનો વહેલી તકે સુખદ અંત આવે. મહેસૂલી કર્મચારી મંડળ વર્ગ-૩ના જણાવ્યા મુજબ, જામનગરમાં ૨૬૦થી વધુ સભ્ય એવા સરકારી કર્મચારીઓ આ અનિશ્ચિત મુદતની હડતાળમાં જોડાયા છે. હડતાળ દરમિયાન કોઈ રેલીનું આયોજન કરવામાં આવ્યું નથી અને કર્મચારીઓ દ્વારા શાંતિપૂર્ણ રીતે ધરણાં તથા વિવિધ કાર્યક્રમો યોજવામાં આવી રહ્યા છે.

લાઈક અને ફોલો કરો અમારું ફેસબુક પેજ FACEBOOK - AAJKAALDAILY

ફોલો કરો અમારું ઇન્સ્ટાગ્રામ INSTAGRAM - AAJKAALDAILY

સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY

મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં 99251 12230

View News On Application

જામનગર શહેરમાં મહેસૂલી કર્મીઓની હડતાળનો બીજો દિવસ, રામધૂન બોલાવી સરકારને જગાડવાનો પ્રયાસ

Recent News

Gujarat's No. 1 evening newspaper