જામનગર: સૈનિક સ્કૂલ બાલાચાડીના ‘સ્વચ્છતા દૂતો’ દ્વારા સ્વચ્છતા અભિયાનનું સફળ આયોજન

જામનગર સ્થિત સૈનિક સ્કૂલ બાલાચાડી ખાતે તા. ૪ ઓક્ટોબર ૨૦૨૬ના રોજ સ્વચ્છતા, સ્વાસ્થ્યપ્રદ જીવનશૈલી અને પર્યાવરણ પ્રત્યેની જવાબદારી અંગે જાગૃતિ ફેલાવવાના હેતુથી એક વ્યાપક સ્વચ્છતા અભિયાનનું સફળ આયોજન કરવામાં આવ્યું હતું.


આ અભિયાનમાં આશરે ૫૦૦ કેડેટ્સ અને ૫૦થી વધુ શિક્ષકો તથા કર્મચારીઓએ ઉત્સાહપૂર્વક ભાગ લીધો હતો. આ વિશાળ ભાગીદારીએ સ્વચ્છતા અને પર્યાવરણ સંરક્ષણ પ્રત્યે સૈનિક સ્કૂલ બાલાચાડીની પ્રતિબદ્ધતાને ઉજાગર કરી હતી.

સમર્પિત શિક્ષકો અને કર્મચારીઓના માર્ગદર્શન હેઠળ કેડેટ્સને વિવિધ ટીમોમાં વિભાજિત કરી ચોક્કસ વિસ્તારો તથા સ્વચ્છતાની કામગીરી સોંપવામાં આવી હતી. કેડેટ્સે શાળાના પરિસર તેમજ પરિસરની બહારના રસ્તાઓ અને આસપાસના વિસ્તારોમાંથી કચરો એકત્રિત કરી સ્વચ્છતા જાળવવામાં સક્રિય યોગદાન આપ્યું હતું.


અભિયાન દરમિયાન કેડેટ્સે મુલાકાતીઓ તેમજ સામાન્ય જનતાને જાહેર સ્થળોએ કચરો ન ફેંકવા, પોલિથીન બેગનો બેફામ ઉપયોગ ટાળવા અને કચરાનો યોગ્ય નિકાલ કરવા અંગે જાગૃતિ સંદેશ આપ્યો હતો. તેમણે સ્વચ્છ પર્યાવરણનું મહત્વ સમજાવતા સ્વચ્છતા એ માત્ર વ્યક્તિગત નહીં પરંતુ સામૂહિક જવાબદારી હોવાનો સંદેશ પણ આપ્યો હતો.

આ સ્વચ્છતા અભિયાન દ્વારા ‘બાલાચડિયન્સ’માં ટીમવર્ક, શિસ્ત, નેતૃત્વ અને સામુદાયિક જવાબદારી જેવા મૂલ્યોનું ઉત્તમ પ્રદર્શન થયું હતું. કેડેટ્સ અને કર્મચારીઓની ઉત્સાહપૂર્ણ ભાગીદારીએ આ અભિયાનને સ્વચ્છ અને હરિયાળા પર્યાવરણ તરફનું એક નોંધપાત્ર પગલું બનાવ્યું હતું.

આ પ્રસંગે સૈનિક સ્કૂલ બાલાચાડીના આચાર્ય ગ્રુપ કેપ્ટન ઉજ્જવલ ઘોરમાડે તથા વહીવટી અધિકારી કમાન્ડર હરિ રામ પૂનિયાએ કેડેટ્સ અને કર્મચારીઓના નિષ્ઠાપૂર્વકના અને નિઃસ્વાર્થ પ્રયાસોની પ્રશંસા કરી હતી. તેમણે કેડેટ્સને શાળાના સાચા ‘સ્વચ્છતા દૂતો’ ગણાવી તેમના ઉત્સાહને બિરદાવ્યો હતો.

સૈનિક સ્કૂલ બાલાચાડીનો દૃઢ વિશ્વાસ છે કે યુવા પેઢીમાં સ્વચ્છતા, સ્વાસ્થ્યપ્રદ આદતો અને પર્યાવરણીય જવાબદારીના મૂલ્યોનું સિંચન કરવાથી સમાજ પર લાંબા ગાળે સકારાત્મક અસર થાય છે. આવી પહેલો દ્વારા શાળા જવાબદાર, શિસ્તબદ્ધ અને સામાજિક રીતે જાગૃત નાગરિકોના ઘડતર માટે સતત પ્રયત્નશીલ છે, જે ભવિષ્યમાં સ્વચ્છ, હરિયાળા અને સ્વસ્થ રાષ્ટ્રના નિર્માણમાં મહત્વપૂર્ણ યોગદાન આપશે.