ખંભાળિયાના તુલસી પાર્કમાં ભર બપોરે ૨.૮૬ લાખના આભૂષણોની ચોરી

મહિલા પરિચિતને ત્યાં જમવા ગયા અને પાછળથી તસ્કરો ત્રાટકયા 

ખંભાળિયામાં તુલસી પાર્ક વિસ્તારમાં આવેલા એક રહેણાંક મકાનમાં ભર બપોરના સમયે તસ્કરોએ ખાતર પાડી, અહીંથી ૨.૮૬ લાખના સોનાના દાગીનાની ચોરી થયાનો બનાવ પ્રકાશમાં આવ્યો છે.

આ સમગ્ર પ્રકરણ અંગે પોલીસ દફતરે જાહેર થયેલી વિગત મુજબ ખંભાળિયામાં રેલવે સ્ટેશન પાછળના ભાગે તુલસી પાર્ક - ૨ ખાતે રહેતા બે સંતાનો અને સાસુ-સસરા સાથે સંયુક્ત પરિવારમાં રહેતા નિરાલીબેન જગદીશભાઈ બાલુભાઈ જોશી નામના ૨૫ વર્ષના મહિલા મંગળવાર તા. ૨૯ ના રોજ તેમના એક પરિચિતના ઘરે જમવા ગયા હતા, જ્યાંથી બપોરે આશરે ૧:૪૫ વાગ્યાના સમયે પરત આવીને જોતા તેમના મકાનમાં ચોરી થયાનું ખુલવા પામ્યું હતું. તેમના ગયા પાછળથી આ બંધ મકાનની ડેલી તથા દરવાજાનું તાળું તોડી, તસ્કરોએ અંદર પ્રવેશ કર્યો હતો. 

આ મકાનમાં રહેલા રૂમમાં કબાટના લોકરનું તાળું તોડી, અહીંથી તસ્કરોએ સોનાના આશરે બે તોલા સોનાના કંગન, સોનાના પેન્ડલ વાળો ચેઈન, એક જોડી સોનાના ઝુમ્મર તેમજ સોનાની પાંચ નંગ વીટી વિગેરે ચોરી કરીને લઈ ગયા હતા.

આ પ્રકરણમાં કુલ રૂપિયા ૨,૮૫,૮૨૮ ની કિંમતના સોનાના દાગીનાની ચોરી થયાનું જાહેર થયું છે. આ સમગ્ર પ્રકરણ અંગે ખંભાળિયા પોલીસે નિરાલીબેન જોશીની ફરિયાદ પરથી તસ્કરોને ઝડપી લેવા માટેના ચક્રો ગતિમાન કર્યા છે. આ બનાવ બનતા અહીંના એ.એસ.પી. પ્રખરકુમાર તેમજ પોલીસ કાફલો ઘટના સ્થળે દોડી ગયો હતો. આગળની તપાસ અહીંના પી.આઈ. સી.આર. રાણા ચલાવી રહ્યા છે.