મહેશ બાબુ સ્ટારર ફિલ્મ ગુંટુર કરમની દર્શકો આતુરતાથી રાહ જોઈ રહ્યા હતા. લાંબી રાહ જોવડાવ્યા બાદ આખરે આ ફિલ્મ 12 જાન્યુઆરીએ સિનેમાઘરોમાં રિલીઝ થઈ છે. મહેશ બાબુ લાંબા સમયથી પડદાથી દૂર હતા. તે છેલ્લે વર્ષ 2022માં આવેલી ફિલ્મ 'સરકારુ વારી પટ્ટા'માં જોવા મળ્યો હતો અને વર્ષ 2023માં મહેશ બાબુની કોઈ ફિલ્મ રિલીઝ થઈ ન હતી.

તેની ફિલ્મ ગુંટુર કરમ વર્ષ 2024 ની શરૂઆતમાં રીલિઝ થઈ છે, જેણે રિલીઝ થતાની સાથે જ રેકોર્ડ બનાવ્યો છે. રિપોર્ટ અનુસાર, ગુંટુર કરમે પહેલા જ દિવસે 42 કરોડ રૂપિયાની શાનદાર ઓપનિંગ કરી છે. પહેલા દિવસની કમાણી સાથે આ ફિલ્મે વર્ષ 2024ની સૌથી મોટી ઓપનરનો રેકોર્ડ બનાવી લીધો છે.

મહેશ બાબુની 'ગુંટુર કરમ'એ તેના ઓપનિંગ કલેક્શન સાથે ગયા વર્ષે રિલીઝ થયેલી સની દેઓલની બ્લોકબસ્ટર ફિલ્મ 'ગદર 2'નો રેકોર્ડ તોડ્યો છે. 'ગુંટુર કરમ'એ પહેલા દિવસે 42 કરોડ રૂપિયાની કમાણી કરી હતી, જ્યારે 'ગદર 2'એ 40 કરોડ રૂપિયાની ઓપનિંગ કરી હતી. 'ગુંટુર કરમ'નું નિર્દેશન ત્રિવિક્રમ શ્રીનિવાસ દ્વારા કરવામાં આવ્યું છે. ફિલ્મમાં મહેશ બાબુ લીડ રોલમાં છે, જ્યારે તેની સાથે શ્રીલીલા અને મીનાક્ષી ચૌધરી પણ મહત્વની ભૂમિકામાં છે. આ સિવાય જગપતિ બાબુ, રામ્યા કૃષ્ણન અને જયરામ પણ ફિલ્મનો ભાગ છે.