દ્વારકા: વરવાળા પ્રા. શાળાના વિદ્યાર્થીઓનું વોલીબોલ અને બેટરી ટેસ્ટમાં શાનદાર પ્રદર્શન
 
ક્રીડા ભારતી દ્વારા રાષ્ટ્રીય રમત વિકાસ અંતર્ગત નંદાણા મુકામે યોજાયેલી અંડર-૧૪ વોલીબોલ સ્પર્ધામાં પીએમ વરવાળા પ્રાથમિક શાળાના વિદ્યાર્થીઓએ ઉત્કૃષ્ટ રમત કૌશલ્યનું પ્રદર્શન કરી દ્વિતીય ક્રમાંક હાંસલ કર્યો હતો. વિદ્યાર્થીઓની આ સિદ્ધિથી શાળા પરિવાર અને વરવાળા ગામનું ગૌરવ વધ્યું છે.

આ ઉપરાંત યોજાયેલા બેટરી ટેસ્ટમાં પણ શાળાના વિદ્યાર્થીઓએ નોંધપાત્ર સફળતા મેળવી હતી. અંડર-૯ કેટેગરીમાં શાળાની વિદ્યાર્થીનીઓ પરમાર લીલા અને અજરીન બુટ્ટા, તેમજ વિદ્યાર્થી રેહાન સમાએ શ્રેષ્ઠ પ્રદર્શન કરી બેસ્ટ વિનરનો ખિતાબ મેળવ્યો હતો. જ્યારે અંડર-૧૧ કેટેગરીમાં ઘાંઘર ભિયળએ પણ ઉત્કૃષ્ટ દેખાવ કરી બેસ્ટ વિનરનો ખિતાબ પોતાના નામે કર્યો હતો. વિજેતા વિદ્યાર્થીઓએ બ્રોન્ઝ તથા સિલ્વર મેડલ મેળવી શાળાનું નામ રોશન કર્યું હતું.

વિદ્યાર્થીઓની આ સિદ્ધિને બિરદાવવા શાળાના આચાર્યા રિમ્પલબેન દ્વારા તમામ વિજેતાઓનું ટ્રોફી અને મેડલ આપી વિશેષ સન્માન કરવામાં આવ્યું હતું. આ સફળતા પાછળ શાળાના યોગ રિસોર્સ પર્સન મેર વિપુલભાઈના અથાગ પ્રયાસો અને માર્ગદર્શનનો મહત્વનો ફાળો રહ્યો હોવાનું શાળા પરિવાર દ્વારા જણાવાયું હતું.
​​​​​​​
રમતગમત ક્ષેત્રે વિદ્યાર્થીઓને સતત પ્રોત્સાહન અને યોગ્ય તાલીમ મળવાથી શાળાના વિદ્યાર્થીઓ આગામી સ્પર્ધાઓમાં પણ વધુ ઉજ્જવળ સિદ્ધિઓ હાંસલ કરે તેવી આશા વ્યક્ત કરવામાં આવી હતી.